AMPATI: South West Garo Hills a·jao, Jal Shakti Abhiyan-Catch the Rain (JSA-CTR) 2025-ni ning·o ka·enggipa Jal Jeevan Mission (JJM)-ni kamrangko nina gita a·jana songe on·gipa Central Nodal Officer Devesh Gupta, re·anggipa Sombar attamo Ampati-ona sokbaaha aro uni ja·man, South West Garo Hills a·jani dingtang dingtang official-rang baksa tom·e chanchirimangaha.
Ia tom·aniko, Ampati Circuit House-o ong·ataha aro ia tom·anio, South West Garo Hills a·jani Deputy Commissioner Hema Nayak, Additional Deputy Commissioner aro JSA-ni District Nodal Officer RZD Shira, dingtang dingtang block development officer (BDO)-rang, aro PHE, Water Resources, Soil & Water Conservation, Agriculture aro Fisheries department-ni officer-rangba dongpae bak ra·angaha.
South West Garo Hills a·jaona ia Central Nodal Officer-ni re·baaniara JSA-CTR-ni ning·o ka·enggipa kamrangni chu·sokaniko nina aro JJM-ni kamrango chu·sokaniko nina re·baanian ong·a.
Gnigipa salo, ia Central Nodal Officer, Betasing, Zikzak aro Rerapara block damgittamni dingtang dingtang project-rangko niangskaaha.
Ia project-rangara, PHE, Water Resources aro Soil & Water Conservation department-ni project-rang aro MGNREGA-ni ning·o tarigipa Amrit Sarovar site-rang ong·a.
Gittamgipa salo, ua re·angpilna skang, South West Garo Hills a·jani Deputy Commissioner, ADC aro gipin officer-rang baksa tom·enba, namdapatna nangenggipa kamrangni bidingo agan-talatanirangko on·angaha.
