SHILLONG: Sohra jolo gimaenggipa Madhya Pradesh a·dokni me·chik tourist Sonam Raghuvanshi-ko da·o sal 13 ong·pilani ja·manba man·pilkujaengon, uko jolni manderangan rim·gittangna nanga ine gimaenggipa me·chikni ma·drangrang, an·tangtangni chanchichipenganiko paraktokaha.
Iani bidingo kobor ra·timgipa manderang baksa agangrikengon, a·bachengode ia jolrango mande rim·gittanga ba ra·seke ra·a dakgipa a·selrang ong·rongja ine jolni manderang a·kangtokachim indiba da·o ka·sinsin chong·mot a·selko ma·sina a·bachengengaha ine Bristibar salo, Sonam Raghuvanshi-ni adagipa Govind parakataha.
Sonam-o mobile phone ge·gni aro jako ra·bitgipa bag dongachim indiba da·alonan ia bosturangni gimin maming kobor dongkujaenga ineba ua aganaha.
Govind-ni aganani gitade, ia mandeko man·na krae nikgipa pilak biaprangonikon sandienggipa dolrang sandiahachim indiba maming chinrangko man·kujaenga.
Ia jolrangoniko NDRF aro SDRF-ni sipairang, ning·tuen sandiengkua ineba gimaenggipa me·chikni adatang aganaha.
“Indake ong·genchimoba da·onan maming chinrangko man·kujaenga. Angni chanchiani gitade, Sonam-ni bosturangkoba Raja Raghuvanshi-ni manggisiko man·gipa biap sambarangonikon man·na nangachim,” ine Govind aganaha.
Police-rangni u·iatani gitade, Raja aro Sonam-ni bon·kame mobile phone location man·gipa biapara Raja-ni manggisiko man·gipa biapon ong·achim ineba ua aganaha.
“Ia jolrangona darangba re·baja ong·ode maikai feet 200 ong·e chugipa a·kuang ka·maon truck-ni truck jabolrang dane dongskaenga?” ine Govind sing·doangaha.
“Joltangni manderangsa manggisiko iandake jaboldamo galna ma·sigen. Angni nikani gitade, ia pilakan chanchisamsoe dakani kamsa ong·a,” ine ua matnangaha.
Gimaenggipa me·chikko man·kujaskal sandiangkuchina sorkariko didiatengon, Raja-ko so·otasa ine ma·siahani gimin da·o uni siani bidingo CBI-chi sandirokatchina gita ua, a·dokni Chief Minister Conrad K Sangma-koba mol·molataha.
