MANGSANG: East Garo Hills a·jani Mangsang songo donggipa Primary Health Centre (PHC)-ko ru·uta bilsirangonin taridaptaia dongkujani a·sel da·o ia health centre be·gruna siengaha aro ian ia centre-o kam ka·enggiparangna kenchakna nangani ong·enga ine Mangsang-ni GSU aro FKJGP unit-rang parakataha.
Koborko on·ani gitade, Mangsang PHC-ko 1995 bilsi a·dokni gitcham chief minister SC Marak sagini somoio rikahachim aro untalan ia health centre-ko taridape on·anirang dongjahachim.
Ia PHC-o da·o doctor saksa aro AYUSH practitioner saksa donga aro ia health centre-o mongsonggipa building baksana staff quarter-rangba te·bonga donga ine u·iatengon, ia nokrang gimikan da·o gitchambeahani gimin be·na siengaha aro ian kam ka·giparangna kenchakna nangani ong·enga ine GSU aro FKJGP Mangsang unit-rang parakataha.
“Adita salrangna skangsan chinga ia PHC-ko nina re·angaha aro PHC-o kam ka·enggipa manderang baksa agangrikon, ia PHC-ni iandakgipa obostao ong·engani gimin suk ong·gijaniko paraktokaha. Ia PHC-o East Garo Hills aro West Khasi Hills a·jani manderangna sanna bananirangko on·enga indiba ia health centre-ko rikdape on·taianirang dongjani gimin chinga namen aiao inmanbea,” ine GSU Mangsang regional unit-ni president Barnawel Sangma aganaha.
GSU Mangsang unit-ni u·iatani gitade, ia PHC-ni pakmarang gil·gaotokengaha, sanchakgipa kuturirangba dadimit chapilengaha aro nokkingrangba ka·sinsin be·rorobaengahani gimin ian kam ka·giparangnasan ong·aigija sanna bananirangko ra·na re·baenggiparangnaba kenchakna nangani ong·enga.
“Mikka waani somoirangode ia PHC selprupruengani a·selan kam ka·giparang tusinamangmangan biaprang dongjaenga aro nok gimikan chirara dakpilenga. Iandakgipa health centre-o maikai manderangna sanna bananirangko on·na man·gen?” ine GSU aro FKJGP Mangsang unit-ni dilgiparang sing·doataha.
Ia PHC-ni bidingo Health department-ni Principal Secretary Sampath Kumar-o sing·sandiaton, iako ua ta·raken niatgen aro taridapna nanganirangko taridapatgen ine ku·rachakaniko on·ataha.
Mangsang PHC be·gruna siengahani gimin kenchakna nangani ong·enga
Date:
Share post:
