SHILLONG: Sohra jolo Madhya Pradesh a·dokni tourist sakgni gimaani ja·man salgro salaram a·dokrangko ‘ong·gija kamrangko nikna man·ronggipa’ ine a·songni songbadrango seahani gimin national media-ni kosako a·dokni Tourism Minister Paul Lyngdoh raken jegalatenba, ian Meghalaya aro salgro salaram jolrango tourism tang·doengani gimin mikbue dakanisan ong·aia ine parakataha.
Meghalaya aro salgro salaram jolrangko mikchepe serongani gimin a·songni songbadrangko jegalatengon, “Meghalaya a·doko tourism-ni tang·doaniko uamang an·tangtangni tourism-na nangchakeaniko ra·bana kenchakesa indake dakenga,” ine Lyngdoh aganaha.
Sohra-o a·sel ong·aniko gisepo ong·ani gitasan ong·aia ine janapatengon, da·o dipet ia a·selni bidingo darangba kakketko ma·sikuja aro ia a·selni bidingo kakketko ma·sina sandirokengkua ine Tourism Minister parakataha.
Sohra jolrangko ‘ong·gija dakgipa biap’ ine a·songni songbado seaniko jegalatengon, indita bilsirangna Sohra jolona a·gilsak gimikonin manderang re·batokaha aro batanggimin somoirango iandakgipa a·selrang ong·a dongkujachim ine Lyngdoh aganaha.
“Sohra-ona 1841 bilsion gipin a·songrangoni manderang sokbaaha aro Ramakrishna Mission-ni headquarter-ba iano donga. Iandake songbadrango seaniara national media-ni ma·sigijaniko aro Meghalaya a·dok baksana a·dokni manderangko mikbuanisan ong·aia,” ine ua aganaha.