SHILLONG: Meghalaya a·doko bida budiko ra·anio manderang agre koros ong·na nangjana gita pilak skulrangkon ka·sinsin deficit gadangona ra·bae sorkarichi chalaina miksongenga ine Bristibar salo a·dok sorkari parakataha.
Iani bidingo kobor ra·timgipa manderangna talataniko on·angengon, da·o dipet a·doko bang·a chatro chatrirangan private institute-rangosa poraina nange bang·en koros ong·na nangengani gimin sorkari, pilak skulrangkon ka·sinsin deficit gadangona ra·bana miksongenga aro ia miksonganirang chu·sokna man·bebegenchimode, chatro chatrirang lekka porako ra·na gita bang·e koros ka·na nangjawa ine a·dokni Education Minister Rakkam Sangma aganaha.
“Ia kamrang name chu·sokna man·genchimode da·o bang·e fee-rangko gamna nangenggipa chatro chatrirang, rang·speaniko man·gnok maina skul fee-rang bewalan komignok aro skigiparangkoba sorkarini ning·o rakkikamgnok,” ine Sangma aganaha.
Da·o dipet Shillong College-o BA course-ni chu·gimik semester-na gong 66,230-mangni gita fee-ko gamna nangenga ine toe janapatengon, skul aro college-rangko sorkarini ning·o chalaiaha ong·ode ia fee-rang gong 15,000-mangona komianggnok ine Education Minister parakataha.
“Apsan daken deficit system-o chalaigipa gipin skul aro college-rangoba lekka porako altuae ra·na man·na gita fee-rangko komiatgnok,” ine Sangma aganaha.
Skigiparangni bidingo janapatskaengon, da·o dipet a·doko skigiparangni gadang 13 gnang aro ia gadangrangkoba sorkari, grant-in-aid government, government aro private-chi chalaigipa gadangona komiatna miksongenga,” ine Education Minister parakataha.
Da·o dipet bang·bata skul aro college-rangan iako namniktokpaenga ine janapatskaengon, “Bang·bata skul aro college-rangan ia dingtanganiko namniktokenga indiba pilak institute-rang baksa name chanchirimchengani ja·mansa ia kamko a·bachenggen. Je institute-rangan iano bak ong·na gita sikjaengachim, uamangde jakgitelgipa ong·na man·aigen aro tangka paisarangko Meghalaya Education Grant gita ra·skana nanggen,” ine Sangma aganaha.
