TURA: Garo Hills Autonomous District Council (GHADC)-o kam ka·enggipa manderangni dormaha man·gija da·o ja 40 batpilengahaoba iani bidingo maming ku·rangko on·jaengani gimin a·dok sorkari aro GHADC-o NPP-chi chalaienggipa Executive Committee-ko Rongrong-ni TMC MDC Rinaldo K Sangma sing·doataha.
GHADC-o kam ka·giparangsan ong·aigija, contractual doctor-rang, deficit aro SSA skulrango skigiparang aro dingtang dingtang department-rango kam ka·enggiparangba mitamrangde jagittam batpile an·tangtangni dormaharangko man·tokkujaengani a·sel neng·nikanirangko chagrongna nangtokenga ine Sangma matnangataha.
“A·dokni Chief Minister an·tangde dingtang dingtang manianirango bak ra·e, krorni kror tangka paisarangko koros ong·ate roenga indiba GHADC aro a·dok sorkarini dingtang dingtang department-rango kam ka·giparangde baditaba jarangni dormaharangko man·tokjae, nokdangtangtangkon chalaina man·tokpajaengaha,” ine Rongrong MDC, an·tangni suk ong·gijaniko parakataha.
GHADC aro dingtang dingtang department-rango kam ka·giparangni dormaharangko on·na man·jaengani gimin a·dok sorkariko matnangatengon, “NPP-chi dilenggipa sorkari aro GHADC-ni EC, an·tangtangko ‘double engine government’ ine a·kangenga indiba ian ramram manderangna bojarangkosa changgni gatdapa gita ong·enga,” ine Sangma parakataha.
Rongrong MDC-ni parakatani gitade, NPP-chi chalaienggipa sorkari, an·tangtangni ning·o kam ka·enggiparangnade dormaharangko on·na gisik nangjaenga indiba ‘consultant’ aro political-ni kamna seokgimin manderangnade tangka paisarangko nangana batpile on·e roskaenga.
“Sorkario tangka paisarang dongja ong·ode maikai political appointee-rangna aro consultant-rangnade gamna man·enga? GHADC-o kam ka·giparang, doctor-rang, skigiparang aro dingtang dingtang department-rango kam ka·enggiparang, an·tangtangko on·kange manderangni namgninan dangdike on·tokpaengachim indiba sorkari, iamangnade dormaharangko on·na gisik nangskajaenga,” ine Sangma matnangataha.
Iandake mikkang nitee tangka paisarangko on·aniara a·doko NPP-chi dilenggipa sorkari aro GHADC-ni EC-ni mongsonggipa daitorangko mesokani ong·enga ine janapatengon, “GHADC aro a·dok sorkarini dingtang dingtang department-rango kam ka·enggiparangna bangki dormaharangko ta·raken on·china anga dabienga,” ine Rongrong-ni TMC MDC parakataha.
 |
ReplyForward
|