TURA: Sukrobar salo, West Garo Hills District Water & Sanitation Mission Committee (DWSA)-ni tom·aniko, Tura-ni Circuit House-o ong·atangaha aro ia tom·anio, National Jal Jeevan Mission (JJM)-ni Central Nodal Officer SK Pandey, Technical Expert Nagaraj KT, West Garo Hills a·jani Deputy Commissioner aro DWSA-ni Chairman Vibhor Aggarwal baksana dingtang dingtang department-ni official-rang aro DWSA-ni membor-rangba bak ra·angaha.
Ia tom·anio, National JJM-ni Central Nodal Officer SK Pandey, a·jao JJM-ni kamrangko nipilangengon, kamrangko ka·enggipa contractor-rang name matchotatna man·na gita kamrangko nambate nirokjringna nangenga ine a·jani official-rangko didiangaha.
“Ia biapona angni re·baanio anga adita JJM project-rangko niangaha aro angni nikani gitade, ia kamrango namdapatna nanganirang dongkuenga. West Garo Hills a·jao JJM-ni kamrangko nambate chu·sokatna man·na gita na·simang pilakan an·tangtangni daitorangko nambate ka·na nanggen,” ine Pandey aganaha.
JJM-ni kamrangko chu·sokatanio chagrongna nangenggipa neng·nikanirangko, mongsongbate a·jani diltubatgipa biaprango iandakgipa neng·nikanirangko chel·chakna man·na gita ia kamo bak ong·enggipa pilak department-rangkon bakrime kam ka·china gitaba JJM-ni Central Nodal Officer didiangaha.
Ia tom·anio, PHE Tura Circle Superintending Engineer-ni office, dingtangmancha video presentation-ko dake, JJM-ni kamrangko talate on·angaha.
Meghalaya a·doko JJM-ni kamrang chu·sokgipa ong·enga ine a·dok sorkari a·kangengoba, a·dokni bang·a biaprangon, mongsongbate Garo Hills-o kamrangko matchote ka·na aro chirangko man·tokjaenga ine bang·en badi ka·anirangko nikna man·skaengachim.
