Samtangtango ong·telaigiparangko ripingna aro rongtale rakkina kam ka·enga ine CM ku·rachaka
SHILLONG: World Environment Day-ko maniani bak gita Sukrobar salo dingtangmancha Shillong songjinmani Mawdiangdiang-o gital rikenggipa Meghalaya Legislative Assembly-o bol ge·ani program-ko ong·atangaha aro ia program-ko ong·atanio a·dokni Chief Minister Conrad K Sangma, Assembly-ni Speaker Thomas A Sangma, Deputy Speaker Timothy D Shira Cabinet Minister-rang, Assembly Secretariat-ni official-rang, Forest department-ni official-rang aro gipinrangba dongpae bak ra·angtokaha.
Ia program-ko ong·atanio a·dokni Chief Minister, jinmana aganprakangengon, a·doko buring bolgrimrangko ripingna aro jillarangko rongtal an·tale rakkina gita sorkari, dingtang dingtang kamrangko a·bachengataha ine parakataha.
Buring bolgrimrangko ripingna aro jillarangko rongtal an·tale rakkina sorkari, ‘Mission Mode’-o kamrangko a·bachengataha ine janapatengon, Shillong songjinmani Marten jabol galramo, kam ka·giparangko bariate aro bio-mining-ko a·bachengate, skatang galgimin jabolrangoni 50%-kode rongtalatna man·aha aro ia apsan kamkon Tura, Jowai aro a·dokni gipin jillarangoba ka·anggen ine Chief Minister parakataha.
2027 bilsio sokachakna sienggipa National Games-na sorkarini a·bachengatgipa ‘Mission Clean Shillong 2027’ program-ni gimin janapangengon, ia kamara jabol chimonge galaniko nambatatna, skatang galgimin jabolrangko rongtalatna aro jillarango rongtal an·talaniko rakkina a·bachengatgipa program ong·enga ine Sangma aganaha.
“Batanggimin bilsisnini gisepo hectare 22,000-mang ong·na sipile buring bolgrimrangko man·dapaha aro pang crore 2-mang ong·na sipile bol chararangko ge·aha. Da·o mikkang bilsi 5-ni gisepo buring bolgrimrangko hectare 40,000-ona bariatanian sorkarini miksongani ong·enga,” ineba ua aganaha.
Payment for Ecosystem Services (PES) scheme-ko chu·sokgipa ong·enga ine a·kangatengon, dingtang dingtang songrangna sorkari gong crore 42 tangkarangko suale, hectare 52,000-na baten buring bolgrimrangko ripingna kam ka·enga ine Chief Minister aganaha.
Green Meghalaya Plus-ni ning·o hectare lak 1 buring bolgrimrangko ripingna nisanko done sorkari, hectare-prakon gong 20,000-ko on·anggen ineba Chief Minister parakataha.
Ia tom·anio Assembly-ni Speaker Thomas A Sangma-ba aganprakangengon, ia gital Assembly Complex-ara samtangtangna maming nangchakeaniko ra·bajana gita tarigiminsa ong·a ine Mawlynnong songo jekai rongtal an·talaniko rakkiachim, apsan daken a·dokni gipin songrangoba rongtal an·talaniko rakkichina didiangaha.
