SHILLONG: Mega Watt 22.5-ni Ganol Small Hydro Power Project-o MW-prakko bikotnan gong kror 26 koros ong·e ia project-na korosrang tang·doangahani gimin jakgitele sandirokatchina gita Opposition dolni dilgipa Mukul Sangma dabiangaha.
Ia Ganol Hydro Power Project-o ong·gija dakanirang dongna nanga ine an·tangni chanchichipenganiko parakatengon, 2010 bilsion ia project-ko gitcham Congress sorkari a·bachengataha aro ia project-ko tangatpilna gita 2014 bilsiona kingking kamrangko ka·aha ine Sangma aganaha.
“Ia project-ko a·bachengatani somoio ia project-ni koros kror 356.46-san ong·aiachim aro 2018 bilsini December jaode ia project-ko matchotani ong·achim,” ine Sangma aganaha.
Indake ong·genchimoba Sangma-ni aganani gitade, ia project-ko matchotna dongimin somoi ong·ahaon da·o ong·enggipa sorkari, korosrangko bariatna tik ka·e, 2019 bilsiode ia project-ni korosko gong 507.7-ona bariataha.
Uni ja·man 2023 bilsioba ia sorkari, Ganol Hydro Power project-ni korosko gong kror 535.34-ona bariattaiaha aro adita salrangna skangmangmang, contractor-rangni bill-rangko gamna gita Cabinet, kror 30 tangkarangko chamatani ja·man da·o ia project-ni chu·gimik koros gong kror 590.88-ona gadoangaha ine Opposition dolni dilgipa parakataha.
“Ia power project-o koros ong·gipa gongprakpraknan sorkari, bijoli jakkalgipa manderangonikosa kajina ra·skagnok aro da·on bijoli jakkalgiparangna ia project-ni gong 12.80 dake kajina sokengaha,” ine Sangma aganaha.
Ganol Hydro Power project-ni matchotangpilahaon korosrangko bariatna tik ka·ahani gimin sorkariko sing·doatengon, ia project-ni korosrango barina nangani kattaan dongjachim ine Sangma aganaha.
“Power project mingsao maikai changni changni korosrang baridaprorona nanga? Ia project-ni chu·gimik koros gong kror 590 ong·ahaode, ia project-oniko bijoli bikotgipa MW-praknan gong kror 26.26 koros ong·engaha,” ine Sangma parakataha.
Ia project-o nangana batpile korosrang tang·doangaha ine jakgitele sandirokatchina dabiangengon, Meghalaya Community Participation & Public Services Social Audit Act-o pangchake ia project-ni bidingo social audit-koba ka·na nanga ine Opposition dolni dilgipa dabiangaha.
