SHILLONG: A·doko cha·ue ba sriksrik koelarangko cho·enba gipin a·dokrangona sriksrik palatenganiko central agency-chi namedake sandiatsrangchina gita Opposition dilgipa Mukul Sangma changsatai gisik ra·ataniko dakenba didianiko on·aha, unbaksana a·doko niamgri koelarangko bikotenba aplsrukatenggipa kamrangni kosako, a·dokni dingtang dingtang manderang bang·a FIR-rangko on·genchimoba sakki-sabutrangko namedake sandijani gimin a·dok police-ni kosakoba Pa Sangma matnange aganaha.
A·dokni dingtang dingtang district-rango bikotgimin koelarang baditana palkugija dongkuengachim, uarangni hisapko skang 2018-2019 bilsirangon parakatmanaha, indide bikotgimin koelarangara lak 2-3 MT-oni lak 32 MT dongkuna nanga, ine Pa Sangma sing·doaha.
A·doko niamgri koelarangko sriksrik bikote palatengani gimin bang·a songdonggipa manderang FIR-rangko on·ahachim, uarangko police mamingsaloba segatja aro batesa a·doko niamgri koela bikotanirang dongjaha inesa police, a·kange aganaha ine Opposition dilgipa aganaha.
“Adam-bidam dakpile koelarangko bikote palatengo mangba police maidakesa, a·doko niamgri koela bikotani sakkirangko police man·chipja,” ua aganaha.
Ia a·selrangko central agency-chi sandiatna nanga, maina uamangsa political-ni gita sinjetako man·aha, niamgri kam ka·anirang Meghalaya-ni nalsao ong·angpilengaha, unigimin sandiani kamrangko Meghalaya sorkarichi jako ra·na nangja, Opposition dilgipa aganaha.
