SIJU: Songni manderang baksa agangrikchenggija aro manderangni nangnikanirangko ra·chenggija Siju Aratika Datra (Mouza No V, A·king No 1, 3 aro 5)-ni Nokma, a·arangko PWD (NH)-na aro ja·mano Forest department-na pakwate on·aha ine Garo Students Union (GSU) Siju regional unit matnangatenba, iani bidingo South Garo Hills a·jani Deputy Commissioner-na seachi badi ka·doataha.
A·kingni a·arangko iandake Nokmani skatang on·aniko jegalatengon, a·kingni a·arangko iandake darangba skatang sorkarina ba jenaba on·na bil dongja aro pilakni nangnikani gitasa ong·na man·a ine GSU Siju regional unit parakataha.
“A·kingni a·arangko iandake on·aniara an·tangna on·gimin bilko Nokmani jakkalsretanisa ong·enga aro ian A·chikrangni daka rikaniko pe·ani gita ong·enga. A·kingni a·arangde jinmani gam-jinsa ong·a aro ia a·arangko Nokma ba darangba an·tangari indake on·na bil dongja. Ia nokmani kamko chinga darangan ra·chakna man·jawa aro ian manderangni gisepo ding·chaoaniko ra·baani ong·enga,” ine South Garo Hills-ni Deputy Commissioner-na badi ka·e seatgipa chittio GSU Siju regional unit parakataha.
Nokmani kamko chanchininggija dakani ong·a ine matnangatengon, iandake a·kingni a·arangko sorkarina ba gipinrangna skatang on·aniara manderangna on·gimin bilrangko re·badeani ong·a aro jolo manderangni tom·tome songdong a·chaaniko golmal ka·ani gita ong·a ine GSU Siju regional unit parakataha.
A·arangko on·na gita Nokmani songgigrikaniko ta·raken den·galpilchina aro iani bidingo ning·tue sandirokchina dabiangengon, iani bidingo district administration-ni gita maming ja·kurangko de·ja ong·ode uamang jingjengatanirangko dakanggen ine GSU Siju regional unit, mikrakataniko on·angaha.