TURA: West Garo Hills a·jao ICAR-Krishi Vigyan Kendra (KVK)-ni Vikshit Krishi Sankalp Abhiyan (VKSA) program-ko re·anggipa May 31 tariko a·bachengataoni da·o 11-gipa sal ong·aha aro ia 11-gipa salo KVK-ni official-rang, dingtang dingtang department-ni official-rang baksa dingtang dingtang songrangona re·ange, songni manderangna agan-talatanirangko on·angaha.
Ia 11-gipa salo, West Garo Hills KVK-oni dolgittam Krishi Rath dolrang, Zikzak Block-ni Koraitola, Kalegaon aro Baghana, Gambegre Block-ni Bolchugre, Jenggitchakgre aro Balamagre baksana Demdema Block-ni Rajpur, Bhaitbari aro Wadagokgre songrangona re·ange, Pre-Kharif campaign-rangko ong·atangaha.
Ia dolrangko, Dr. Joyoshree Mahanta (SMS, Plant Protection), Naorem Arun Kumar (SMS, Soil and Water Conservation) aro Dr Puja Chakraborty (SMS, Aquaculture) dilangaha aro uamang baksana ICAR-RC for NEH region-ni Dr. Christy Sangma (Scientist, Soil Science) aro Dr. Tasso Tayung, (Scientist, Fisheries), CSS-CAU-oni Dr Saswati Pattanaik, Dr. Toko Jumi, aro Dr. Jogeeta Laimayum baksana gipin department-rangni official-rangba dongpaaha.
Game ge·e cha·giparangna agan-talatanirangko on·angengon, maikai ia gital chasongo gital gama ge·ani kolrangchi nambate gama ge·anirangko dakna man·gen, uarangni bidingo official-rang, game ge·e cha·giparangna agan-talatanirangko on·angaha.
Ia VKSA campaign-ko ong·atani miksonganiara, gama ge·anio jakkalgipa gital kolrangko aro gital bitchilni rokomrangko ma·siate on·na, Soil Health Card-rangko jakkalani gamchataniko u·iatna, sorkarini dingtang dingtang scheme aro policy-rangko u·iatna, game ge·e cha·giparangni u·i-ma·sianirangko knatime ra·na aro uandakgipa kamrangan ong·a.
Ia program-ko ong·atanio sak 715 game ge·e cha·giparang aro sak 559 me·chikrangko man·chape gimik sak 1274 manderang bak ra·angtokaha.