RESUBELPARA: Adita salrangna skang, Madhya Pradesh a·dokoni re·bagipa tourist saksako uni jikgipa aro adita sak manderangni so·ote galani bidingo gipin biaprangoni re·baenggipa manderangko nambate nirikkina gita a·doko Inner Line Permit (ILP)-ko ra·gatchina dingtang dingtang dolrangni a·dok sorkario dabiangani ja·man Garo Enlightenment Society (GES) dolba, ILP-ni bidingo ma·mong sorkari baksa agangriktaichina didie, a·dokni Chief Minister Conrad K Sangma-na sedoataha.
“Meghalaya a·doko ILP-ko ra·gatchina dabianiara ru·uta bilsirangoni dabienggipan ong·a aro ian salgro salaram jolrango songdongenggipa Tribal-rangko chel·chakna a·songni niam bidiko pangchake dabianian ong·enga,” ine GES-ni dilgiparang, Chief Minister-na sedoatgipa chittio parakataha.
Adita salrangna skang Sohra jolo ong·anggipa a·selni gimin janapatengon, ia a·selna mitam national media-rang aro mitam manderang, Meghalaya a·dokko aro salgro salaram jol gimikko ong·gija dake matnangna jotton ka·aha indiba ja·mano ia mandeko, uni jikgipasa a·doktangni manderangkon rimbae so·otataha ine ma·sina man·aha ine GES parakataha.
“Ia a·sel ong·anian Meghalaya a·doko ILP-ko ra·gatna gita ma·mong sorkariko didina namgipa somoi aro chol ong·enga ine chinga bebera·a. Uni gimin a·doko ILP-ko ra·gatchina dabienggipani bidingo a·dok sorkarian ma·mong sorkari baksa agangrikdilgenchimode chinga aro a·doko songdongenggipa pilak manderangan mittelbegen,” ine GES, Chief Minister-na seatgipa chittio janapataha.
Meghalaya a·doko ILP-ko ra·gatchina dingtang dingtang dolrangni dabianio a·doko songdongenggipa pilak manderangkon aro a·dok sorkarikoba bakrimchina GES didiataha.
