Kulshi chibimao dam rikna tik ka·aniko Assam-M’laya-ni manderang jegala

BOKO: Assam aro Meghalaya a·dokni simao mingsinggipa Kulshi chibimao dam rikna tik ka·aniko a·dok damgnio donggipa dingtang dingtang dolrang raken jegalgrimtokaha.
Adita salrangna skang, Assam a·dokni Chief Minister Himanta Biswa Sarma aro Meghalaya a·dokni Chief Minister Conrad K Sangma, Guwahati songjinmani Koinadhora Guest House-o tom·aniko ong·atanio, ia Kulshi chibimao 55 Megawatt Hydro Power-cum-Irrigation Project-ko rikna tik ka·angahachim.
Indake ong·engon, re·anggipa Sombar salo, Assam aro Meghalaya a·dokni dingtang dingtang dolrang, jekai All Rabha Students Union (ARSU), All Rabha Women Council (ARWC), Garo National Council (GNC), Garo Youth Council (GYC), Garo Students Union (GSU), Garo Women Council (GWC), Khasi Students Union (KSU) aro uandakgipa dolrang, tom·aniko ong·atangenba, Kulshi chibimao Hydro power aro irrigation project rikna tik ka·aniko raken jegalgrimtokaha.
Ia tom·anio, ARSU-ni general secretary Subhash Rabha, jinmana aganprakengon, ia Ukium jolara samtangtango ong·telaigiparangko ripingna ja·ku de·enggipa biaprangsa ong·ani gimin ia jolo donggipa Ukium chibimao dam rikna tik ka·aniko uamang raken jegalenga ine parakataha.
“Ia Kulshi chibimao dolphin-rangba dongani gimin ia chibimao hydro power project-ko kuligenchimode ian chio donggipa jonturangnasan ong·aigija jolo songdongenggipa manderangnaba nangchakeaniko ra·bagnok. Ia chibimao metre 62 chugipa dam-ko rikgenchimode ian jolo songdongenggipa manderangna kenchakna nanganiba ong·gen,” ine Rabha aganaha.
Ia tom·anio GNC-ni dilgipa Enindra Marak-ba jinmana aganprakangengon, Ukium songo dam-ko rikgenchimode ian Assam aro Meghalaya a·dokni bang·a songrangnan nangchakeaniko ra·bagen, uni gimin ia biapo dam rikaniko a·dok damgnio songdongenggipa Garo, Rabha, Boro, Khasi aro pilak jatrangan jegalenga ine parakataha.
Ia biapo dam-ko rikgenchimode ian samtangtango ong·telagipa buring bolgrim, chiring chibisik aro pilaknan nangchakeaniko ra·bagen ineba Marak aganaha.
Ia biapo dam rikna tik ka·aniko Ukium songni saksa dilgipa Jawaharlal R Marak-ba jegalatengon, ia biapo dam rikna tik ka·aniko uamang 2011 bilsion jegalaha aro da·oba jegalangkuaigen ine parakataha.