Salchetna police-rangni jako kachari pakwata
SHILLONG: Raja Raghuvanshi-ko so·otanina matnanga man·gipa Sonam aro gipin sakbri manderangko, Budbar pringwalo Shillong-ona rim·baani ja·man Budbar attamchibara uamang gimikkon, District & Sessions Judge-ni kachario mikkangpaataha aro ia manderangko talbate sing·sandiangkuchina gita kachari, salchetna police-rangni jako pakwate on·ataha.
Raja Raghuvanshi-ko so·otna gita uni jikgipa Sonam-an chanchidilchenggipa ong·a ine police-rang matnangengachim aro uko Meghalaya Police, Mongolbar walon Patna-oniko rimbaenba, Budbar pringwalni 12:30 bajimango Shillong-ona sokbaaha. Shillong-ona sokbaani ja·man Sonam-ko porikka r·e nina joljol Shillong songjinmani Ganesh Das Hospital-ona rimangaha aro porikka ra·e nion ua an·o dongkuja ine ma·sina man·aha. Hospital-o porikka ra·e niani ja·man Budbar pringwalni 3:00 bajimango uko Shillong Sadar Police Station-ona rimangpilaha.
Ia a·selna matnangako man·e rim·a man·gipa gipin sakbri manderang, chong·motan Sonam-ni mikchagipa Raj Kushwaha, Vishal Singh Chauhan, Akash Rajput aro Anand Kurmi-koba Budbar pringo, Shillong-ona rim·baaha aro uandaken uamang sakbongakon Budbar attamo, District & Sessions Judge-ni kachariona police-rang rimangaha.
Iani bidingo talataniko on·angengon, matnanga man·e rim·a man·gipa sakbonga manderangan police-rangni mikkango an·tangtangni dosrangko ku·rachakaha indiba police-rangni mikkango ku·rachakakode kachario ra·chakjani gimin kacharioba uamangni ku·rachakaniko chipe ra·na nanggen ine East Khasi Hills a·jani Superintendent of Police (SP) Vivek Syiem parakataha.
Ia sakbonga manderangko da·o kachari, salchetna police-rangni jako on·ahani gimin uamangko bilake sing·sandina a·bachenggnok ineba Syiem aganaha.
A·sel ong·gipa biapona ia manderangko rimangna miksongenggipani gimin janapatskaengon, “Skanggipa chinga uamangko sing·sandichengna nanggen. Ia manderangko sing·sandianirang matchote, uamangni ku·rachakanirangko see ra·ani ja·mansa Special Investigation Team (SIT), ia manderangko a·sel ong·gipa biapona rimange sing·sandina somoiko ra·gen,” ine SP aganaha.
SP-ni parakatani gitade, ia a·selni bidingo da·o dipet police-rang sakbongakosan rim·kuenga indiba ia manderango sing·sandie gipinrangba jak donga ine ma·sigenchimode gipinrangkoba rim·angkugen.
“Chingna kachari salchet somoiko on·ahani gimin chinga ia manderangko sing·sandina a·bachenggnok aro sing·sandianio gipinrangba jak donga ine ma·sigenchimode gipinrangkoba rim·kugen,” ine ua aganaha.
May 11 tariko bia ka·ani ja·man Raja aro Sonam, honeymoon-na Shillong songjinmaona re·baaha indiba uamang, May-ni 23 tarik pringo, Nongriat songo donggipa homestay-oni ong·katangani ja·man gimaahachim. Raja-ni sogimin manggisikode June 2 tariko man·aha indiba Sonam-de ua somoionin gimachipe dongaha.
Indake ong·engon, ua re·anggipa Robibar walosa Uttar Pradesh a·dokni Ghazipur-o donggipa Nandganj Police Station-o an·tangko bame on·eaha. Raja-ko so·otanina matnanga man·enggipa mande sakgittam, chong·motan Akash Rajput, Vishal Singh Chauhan aro Anand Kurmi-ko dingtang dingtang biaprangoniko rim·ani ja·mansa Sonam, an·tangko police-rangna bame on·eaha.
Raja-ko so·otna tik ka·dilgipa Raj Singh Kushwaha-koba ja·mano police-rang rim·na man·aha.
Ia mande sakgittamko Raja aro Sonam baksa tour guide saksa Albert Pde-sa nikchengahachim aro uamangni photo-rangko nikon ua ia manderangan ua somoio uni nikgiparang ine ma·sina man·aha.
 |
ReplyForward
|