SHILLONG: Raja Raghuvanshi-ko Sohra jolo, uni jikgipa Sonam aro gipin manderangni so·otanichi Meghalaya a·dokna aro salgro salaram jol gimiknan namgija bimingko ra·baani gita ong·ahani gimin Budbar salo, Raja-ni nokdang, Meghalaya sorkario kemako bi·ataha.
Raja-ni nokdangna pilak nanga dakchakanirangko on·ahani giminba sianggipa Raja-ni adatang Sachin Raghuvanshi, Meghalaya sorkariko mittelpilataha.
“Sonam Raghuvanshi-ni a·sel Meghalaya a·dok gimikko matnangahani gimin anga Meghalaya sorkario kemako bi·na ska. Police-rang ia a·selko sal 17-ni gisepon rim·na man·aha. Chingni nangan somoirango ching baksa ong·ahani giminba anga Meghalaya sorkariko mittelna ska,” ine Sachin, kobor ra·timgiparangna aganaha.
Indake ong·engon, sianggipa Raja-ni jikgipa Sonam-ni nokdangkoba Meghalaya Police-o kema bi·china, sianggipa Raja-ni pagipa Ashok Raghuvanshi dabiangaha.
“Uamang Meghalaya Police-ko kragija dake matnangahani gimin kema bi·na nangchongmota. Anga an·tangba uamangko kragija kattarangchi aganahani gimin kemako bi·enga. Angni depante siahaoba uko Meghalaya Police, sandie man·aha. Ia a·selni bidingo matchote sandirokna nanga aro dos dakgipa manderang pilakkon pasi on·na nanga,” ine Ashok aganaha.
