TURA: Phulbari-oni Goeragre-ona dakbagipa NH-127B ramako tarina sorkarini ra·gipa a·ani tangkarangko ta·raken a·a nokgiparangna gamchina didie All Meghalaya Minority Students Union (AMMSU), West Garo Hills a·jani Deputy Commissioner-na sedoataha.
West Garo Hills a·jani Deputy Commissioner-na sedoatgipa chittio AMMSU-ni parakatani gitade, ia a·arangko NHAI, 2025 bilsini April jaon ra·aha aro a·a nokgiparangba an·tangtangni a·arangko sorkarina on·ahachim indiba da·alonan a·a nokgiparangna tangka paisarangko gamkujaenga.
West Garo Hills a·jao NH-127B ramana 0.00 KM-oni 62.75 KM-ona Road Transport & Highways Ministry-ni gita a·arangko ra·ahani gimin ia a·a nokgiparangna ta·raken tangka paisarangko gamchina AMMSU dabiangaha.
A·a nokgiparangna tangka paisarangko on·kujaengani a·sel a·a nokgiparang neng·nikanirangko chagrongna nangtokenga ine janapatengon, tangka paisarangko gamkujaskalde ia a·a nokgiparang, gital nokrangkoba rikna man·kujawa aro da·o dongenggipa nokrangkoba pe·e galna man·jawa ine AMMSU parakataha.
Ia NH-127B ramana an·tangtangni a·arangko on·na nanggipa nokdangrang, ta·raken gital nokrangko rike dongna man·na gita ia nokdangrangna compensation-rangko gamatchina gita AMMSU, West Garo Hills a·jani Deputy Commissioner-ko didiataha.
