INDORE: Meghalaya Police-ni sandirokanio, Raja Raghuvanshi-ko uni jikgipa Sonam Raghuvanshi-an so·ote galna chanchichengaha ine ma·siani ja·man, Sonam-ni nokdangba, unbaksa bakrimjana aro una siani sastiko on·china dabiangaha.
Budbar salo Sonam-ni adagipa Govind Raghuvanshi, Raja Raghuvanshi-ni ma·a paako grongeaha aro Raja-ko Sonam-ni so·otna tik ka·dilahani gimin kemako bi·aha. Uni nogipa Sonam, an·tangni segipakon so·otahani gimin siani sastiko man·na kraa ineba Govind, Raja-ni ma·gipana aganaha.
“Sonam-ni neng·nikanirangko man·engmiting somoio chinga uko galchipgnok aro darangba uko re·ange grongejawa. Meghalaya-o uko bichal ka·engmiting somoirangoba chinga una maming dakchakanirangko on·jawa. Ua dosi gnang ine kachari rim·a man·ode, uni dosni kri siani sastiko on·china chingni skani ong·a,” ine Govind, Raja-na adagipa Vipin baksa kobor ra·timgiparangna aganaha.
Sonam aro Raj Kushwaha-ni gisepo mikchagrika dongachimma ine sing·on, iani giminde ua mamingkoba ma·sia dongja ine Govind aganskaaha.
“Uamang mikchagrikenga ine anga an·tangde koborrangonikosa ma·siaha. Raj Kushwaha-de Sonam-ni business-o kam ka·gipasan ong·aiachim aro Raj-na ua (Sonam), ‘rakhi’-koba karongachim,” ine Govind aganaha.
Raja-ko so·otanina chanchichipenggipa sakgipin mande Jitendra Raghuvanshi-ni gimin sing·skaon, “Ua (Jitendra) angni jong-ada gitasa ong·a aro uaba nokdangni bading chiwalanio kam ka·gipasa ong·aia,” ine Sonam adagipa aganaha.
Indake ong·engon, Budbar salo Meghalaya Police, Indore Police baksa matnangako man·gipa Vishal Chauhan-ni nokonaba re·angaha aro nokoniko am·sandianirangko dakangaha. Uni nokoniko am·sandion, Raja-ko so·otanio uni gangipa chola ba·rarangko police-rang man·aha.
“Chauhan-ni ku·rachaka gita chinga uni Raja-ko so·otanio gangipa chola ba·rarangko ra·baaha,” ine Indore-ni Assistant Commissioner of Police (ACP) Poonamchandra Yadav, kobor ra·timgiparangna aganaha.
Ia chola ba·rarangko Meghalaya-ni police-rang, an·chi dagirang dongama dongja uko am·sandina Forensic Science laboratory-ona watatgen ine Yadav aganaha.