SHILLONG: North Shillong-ni MLA aro party-ni dilgipa Adelbert Nongrum-ko bilsigittamna party-oniko ra·galna tik ka·ani bidingo Voice of the People’s Party (VPP), Meghalaya Assembly-ni Speaker Thomas A Sangma-na u·iatkujaenga.
VPP-ni MLA Nongrum-ko party-ni kosako kamrangko ka·a ine matnangenba, re·anggipa March jaon VPP ra·galahachim ine nikna man·a.
Indake ong·engon, Nongrum-ko party-oniko ra·galani bidingo da·onan Speaker-ni office-o maming u·iatanirangko man·soa dongkuja ine Bristibar salo, kobor on·timgiparang parakatskaaha.
Iani bidingo sing·anirangna aganchakaniko on·angkuengon, Assembly-ni record-ode da·oba Nongrum, VPP-ni MLA-an ong·kuenga ine kobor on·timgiparang parakataha.
Nongrum-ko ra·galani bidingo u·iatanirangko man·soani ja·mansa Assembly-ni Speaker, nanga gita ja·kurangko de·anggen ineba kobor on·timgiparang parakataha.
Session-rangko ong·atani somoirango party-ni membor-rangna biaprangko tarisona nangani gimin Nongrum-ko ra·galani bidingo VPP, Assembly Speaker-na u·iatna nangchongmota ineba ua aganaha.
Kobor on·timgipani parakatani gitade, political party-rangoniko ra·galgenchimoba MLA-rangna Assembly-ni membor ong·anioba maming nangchakeanirang dongja.
“Uko ra·gala ra·galgijanide party-ni ning·osa ong·aia aro Assembly-ni membor ong·aniode maming nangchakeani dongjawa. Indiba anti-defection law-ko pe·genchimosa ian nangchakeaniko ra·banaba gnang,” ine kobor on·timgiparang talataniko on·angaha.