SHILLONG: Shillong songjinmani Mawdiangdiang-o rikenggipa gital Assembly nokko somoi gita matchotatna sorkari krengengon, ia nokko rikenggipa contractor-rang aro designer-rang, jadokoni jachetmangna somoiko ra·dapskaaha.
“Chinga man·a dipetde ia gital Assembly nokko ta·raken matchotatna krengenga indiba da·o dipet chinga indita jao ba indita tariko matchotgen inede aganna man·kujawa maina nokko rikenggipa contractor-rang aro designer-rang, ia Assembly nokko name matchotatna somoirangko ra·kuenga. Assembly nokko chinga namesa matchotatna nangnikengani gimin kamko ka·anio sikkelna nangnikjaenga,” ine Sukrobar salo, Assembly-ni Speaker Thomas A Sangma, High Powered Committee (HPC)-ni tom·aniko ong·atani ja·man kobor ra·timgiparangna aganaha.
Sangma-ni parakatani gitade, ia gital Assembly nokko matchotatna gita contractor-rang aro designer-rang jadokoni jachetmangni gita somoiko bi·dapenga.
Kamrangko ta·rakbatatna gita ia tom·aniko ong·atangaha ine janapatengon, ia gital Assembly-ko sorkari, somoi gita matchotna krenge kamko ka·engoba, ia gital nokko rikanio dakgualanirang dongjana gita sikkelna nangnikjaenga ine Assembly Speaker aganaha.
“Kamrangko nipilna gitasa ia tom·anikode ong·ataha aro kamrangko somoi gita aro name matchotatna chinga ja·kurangko de·aha. Kamrangko sikkele ka·anichi chinga mikkangchina ia Assembly nokko namgija ong·atna sikjaenga,” ine Sangma aganaha.
Ia gital Assembly-ko matchotna donenggipa somoini gimin sing·on, da·o dipet ia nokko dongimin somoi gita matchotangenga indiba rang·gitik a·sel ong·gnikode darangba agansamsona man·jani gimin matchotani somoikode aganna man·kujawa ine Sangma aganaha.
“Da·o dipet kamrang nanga gitan chu·sokenga indiba rang·gitik a·sel ong·gnikode darangba agansona man·ja. Chinga ia nokna maming kenchakna nanganiko ra·bana sikjaenga. Da·aloba bang·gija mikkarang waangahaon, nokkingo gam·anirangko knana man·aha aro iako chinga namatna tik ka·aha. Dingtang dingtang neng·nikanirangko namatna gita chinga u·i-ma·sigipa manderangko ia kamo bak ong·atna tik ka·aha,” ine Assembly Speaker aganaha.
Ia gital Assembly nokko rikanio ong·enggipa korosni bidingo janapatskaengon, “Da·o dipet chinga tik ka·gimin korosna batatkujaenga indiba bang·a bang·ja nangdapgipa korosrangni giminde aganna man·ja. Indiba man·a dipet chinga a·bachengo tik ka·gimin korosna batatjana jotton ka·enga,” ine Sangma aganaha.