SHILLONG: Meghalaya a·dokona niam gri napsrukanirangko champengna gita ru·uta bilsirangonin a·dokni dingtang dingtang dolrang, Inner Line Permit (ILP)-ko ra·gatchina dabitokengoba da·onan chu·sokgipa ong·kujaengon, Sukrobar salo dingtang dingtang dolrangni nangrime bikotgipa Confederation of Meghalaya Social Organisations (CoMSO), ILP-na dabianiko gisik ra·attaina gita Shillong songjinmani Secretariat mikkango jinma jingjengatangaha.
Ia jingjengataniko ong·atani bidingo kobor ra·timgiparangna talataniko on·angengon, 2019 bilsion Meghalaya Assembly, ILP-na resolution-ko pass ka·ahachim indiba ia resolution-ko Ministry of Home Affairs (MHA) ra·chakama jechakaha, ukoba a·dok sorkari jinmana talate on·chipkujaenga ine CoMSO-ni chairman Roykupar Synrem janapatenba, iani giminsa sorkariko gisik ra·attaina gita ia salo dingtang dingtang NGO-rang, ku·cholsan ong·e jingjengatenga ine parakataha.
A·doko ILP donggenchimode, adita salrangna skang Sohra-o ong·anggipa a·selko champengna man·genchim ineba ua aganaha.
Bangladesh aro Myanmar a·songrangoni niam gri napsrukbae songdongenggipa manderangko sandina aro rim·na Special investigation team (SIT)-ko songna gita a·dok sorkarina ge·etaniko on·atchina gitaba CoMSO, ma·mong sorkariko didiatskaaha.
“Meghalaya a·doko ILP-ko ta·raken ra·gatchina chinga dabienga,” ine Synrem aganaha.
Adita salrangna skang, Sohra jolo ong·anggipa a·selni gimin janapatengon, “A·doko ILP donggenchimode Raja Raghuvanshi-ko so·otna skang, ia manderang name chanchichenggenchim maina ILP donggenchimode a·dokona re·baenggipa manderang skanggipa an·tangtangni chu·gimik biming, address aro pilakkon segatna nanggenchim,” ine CoMSO-ni chairman aganaha.
“Sonam-ko sandianio Meghalaya a·dok somoi aro korosrang bon·na nangaha. A·doko ILP-ko ra·gatgenchim ong·ode uni, Raja-ko so·ote Indore-ona re·angpilako ma·sina man·aignokchim. A·dokona re·baenggipa aro re·angenggipa manderangni gimin see rakkianiko nangengani giminsa a·dokna ILP-ko nangchongmotenga,” ine Synrem aganaha.
A·doko bang·en iandake ong·gija kamrangko ka·e katangenggipa manderang donga indiba a·dokona re·baenggipa manderangko see rakkianirang dongjani a·selan police-rang, iandakgipa bang·a manderangkon rim·na man·jaenga ineba ua aganaha.
“Iandakgipa a·selrangko champengna gita a·dokna ILP-ko nangchongmota,” ine Synrem aganaha.
Pahalgam-o bobil dake chakatgipa manderangni dosgri manderangko chadrapani ja·man, Bangladesh aro gipin biaprangoni re·bae a·songo niam gri songdongenggipa manderangko sandie biaptangtangona watpilatna gita pilak a·dokrangkon a·ja ge·antion special investigation team (SIT)-rangko songchina ma·mong sorkarini ge·etgipani bidingo janapatskaengon, Meghalaya a·dokode da·onan iandakgipa ja·ku de·anirangko nikna man·kujaenga ine CoMSO parakatenba, a·doko SIT-rangko songna gita a·dok sorkariko ge·etatchina ma·mong sorkariko didiataha.
“Mumbai, Delhi aro gipin biaprango rim·ako man·enggipa manderang pilakan, India-ona re·bana altubatgipa cholgugade Meghalaya a·dokan ong·a ine agantokenga. A·dokni dingtang dingtang dolrang, Meghalaya-o Bangladesh-ni manderangko bang·en rim·na man·aha indide maikai Meghalaya-o Bangladesh-ni manderang dongja ine aganna man·gen? Uni gimin ma·mong sorkarini ge·etaniko ra·china chinga a·dok sorkariko didienga,” ine CoMSO-ni chairman parakataha.