Tura: Central Agriculture University (CAU)-College of Community Science-ni Techno Incubation Centre (TIC) for Jackfruit Processing, June 10 tarikoni 13 tarikona salbrina Jackfruit Processing-ni bidingo training programko ong·atanio namen matchotangaha.
Meghalaya sorkarini Horticulture Department, ATMA (Agricultural Technology Management Agency-ni official-rang programo bakko ra·angaha. Una agreba adita sak entrepreneur-rangba bakko ra·e te·brongoniko dingtang dingtang cha·anirangko tariani bidingo skie ra·aha. Training-ko ong·atna Meghalaya sorkarini Directorate of Food Processing dakchakaha.
Te·brong karini somoio bang·en te·brong biteko skatang galramramani gimin uarangko maidake galgija, dingtang dingtang cha·anirangko tarie namgniko ra·na man·gen iarangni gimin training-o skie on·aha. Training-o bak ra·giparangna food safety standard, hygiene ba rongtal-an·talani bewal, marketing strategies ba pala-sim·ani gimin skie on·aha, iarangna agreba te·brongoniko maikai dingtang dingtang cha·anirang jekai- papad, chip, mixture, squash, achar ba uandakgiparangko tarina skie on·aha.
Programo WGH-ni DC Vibhor Aggarwal, mongsonggipa sokgipa ong·e bakko ra·angon College aro Techno Incubation Centre-ni iandakgipa programko ong·atanina de·mittelaha. Garo Hills-o te·brongko bang·e man·a indiba ia biteko cha·na amchakjae galronga, uarangko galani palo dingtang dingtang cholrangchi kamaina man·a ine aganaha.
Indake College-ni Dea Dr. Jyoti V. Vastard-ba Garo Hills-o te·brongko man·karini somoio bang·e galani gimin uarangko aganangaha. Megahalaya a·doko lak 4-5 pang te·brong bolrang donga, jeoni Garo Hills-o bang·bata. Indiba chu·onga gita processing infrastructure dongjani gimin aro palani-sim·ani cholrang komiani gimin a·doko pangna bilsian te·brong man·karini somoio lak 10.87 metri tonne-ni te·brongko galronga, uan kror 434 damni ong·gen. Ia programara Mission Jackfruit-ni bak ong·a.
