Sohra-o obosta ong·anga ja·manba a·dokona songrebagiparang komija: Paul

Shillong: Meghalaya a·dokni Sohra-ona, Indore oni bia ka·daldal jiksesani honeymoon manina re·baenba a·sel ong·a ja·man India a·song gimiko Meghalaya a·dokko kragija katta rangchi agan chonnikahaoba a·dokona gipin a·songoni aro India a·songni gipin a·dokrangoni songrebagiparang komija ine a·dokni Tourism Minister Paul Lyngdoh u·iatangaha.
A·dokni Tourism Minister ni u·iatani gita ia bilsio ong·nasienggipa Cherry Blossom Festival ni gisepo a·dokona songrebagipa manderang gimik lak 20 mang ong·gnok. Indake a·doko a·sel ong·gipani mamla chu·gimiksrange  matchotkujaoba Sohra-ona songrebagipako niatgenchimode salsa batrikrik bang·e sokbaaniko nikna man·enga jean Cherry  Blossom maniaona niksamsoani gita lak 20 mande rangni songrebaaniko ga·dapgnok ine Paul kobor ra·timgiparangna u·iatangaha.
Indake Sohra-o jiksesa a·sel ong·a ja·man a·dokni kosako aro a·doko songdonggipa manderangni kosako kragija kattarangchi agangipa manderangni kosako, aro a·songo niksenggipa media rang jean Times of India, Republic TV, aro bang·a Social Media jakkalgiparangni ja·pang ja·dilko talchenggija a·dokni kosako matnangahaoba gimagipa jikgipako man·a ja·man janapgimin media rang kema bi·aha.
Unbaksana a·doko songrebagiparangni bidingo see rakkianiko dakna gita a·dok sorkari ‘Tourism app’ ko a·bachengate on·aha, jekon ia somoi ni bako 50% mangsan iano segate rakkianiko dakengkuoba re·baenggipa somoio ia app ko gimik hotel, resort-rango nangchongmotgipa dake ra·gatanggen,  jeon tourist rangni re·ruraaniko, uamangni gari-gora jakkalaniko, aro a·dokona re·baahaon homestays, resorts, aro hotel rango dongchakna gita kakket u·iataniko on·e segate rakkianiko dakna Tourism Minister u·iatangaha.
Iana agre a·dok sorkari gisiko nanggipa chadamberang jemanan Khasi, Garo, English aro Hindi ku·sikko srange aganna sapa uamangna ‘Tourist Buddy Scheme’ ba tourist rang baksa re·chap dochapna gita dorgasto ko galna u·iataniko on·aha jeon sak 100 na bate tourist guide rangko rimnapgen.