MANGSANG: East Garo Hills a·jao donggipa Mangsang songni PHE office-ko ru·uta bilsirangonin taripile on·a dongjani a·sel ia office be·gruna siengaha ine Mangsang-ni FKJGP aro GSU dolrang parakataha.
Dolgni NGO-rangni parakatani gitade, ia PHE office-o kuturi ge·gittam donga aro ia kuturi ge·gittamoni ge·gnide da·o matburingrangko donchaknamangmangba namsrangjaha indiba da·alonan ia office-ko sorkari taridape on·anirang dongkujaenga.
Ia Mangsang PHE office, Rongjeng sub-division-ni ning·o ga·aka aro NGO-rangni parakatani gitade, ia office-o komibeoba sak 12 muster roll worker-rang, JJM aro PHE-ni gipin kamrangkoba nirokpaengachim. Indake ong·genchimoba ia office-o kam ka·enggiparang, walni somoirangoba kamrangko ka·na nange, ia be·gruangna sienggipa office-on tusie kamrangko ka·na nangtokenga ine NGO-rang parakataha.
“Ia Assam type office nok da·o obosta dongsrangjaha aro ia office-ni kuturi ge·gniode do·ga aro kelkirangba dongja aro pakmarangba be·tokaha. Ia office-o kuturi ge·sasan namkalaiaha aro iaba nokkingrang sele, mikkarang waani somoirangode kamrangko ka·na man·tokjaenga. Ia PHE office-o kam ka·enggiparang iandakgipa obostao kamrangko ka·na nangtokengani gimin chinga namen duk ong·a,” ine GSU Mangsang regional unit-ni president Barnawel Sangma aganaha.
Ia PHE office-ni obosta namsrangjahani a·selan da·o matburingrang dongchaknamangmangba namjaha ineba ua aganaha.
“Iandakgipa sorkari office chingni jolo dongkuengani gimin chinga namen suk ong·ja aro sorkari iako ta·raken niatna nanga,” ine FKJGP Mangsang unit-ni president George Sangma aganskaaha.