SHILLONG: North Eastern Hill University (NEHU)-o ja·delbatsranggipa professor Nirmalendu Saha-ko ku·mitdu ra·anina Central Bureau if Investigation (CBI)-ni rim·ani ja·man NEHU Teachers Association (NEHUTA)-ba suk ong·gijaniko parakataha indiba uni kosako matnanganiara kakket ong·bebegenchimode una chakpaanirangko on·na man·jawa ine talataniko on·angaha.
Iani bidingo kobor ra·timgipa manderang baksa agangrikengon, Prof Saha, salgnina Gauhati University-o porikkani kamrang dongani gimin ua somoio chutti ra·angahachim ine NEHUTA-ni president Lakhon Kma parakataha.
“Prof Saha, ku·mitdu ra·a ine matnanganiara kakket ong·bebegenchimode ian namen dukni katta ong·a aro uaba association-ni membor saksa ong·paani gimin ian NEHUTA-na namgija bimingko ra·baani gita ong·aha,” ine Prof Kma aganaha.
NEHU-ni Prof Saha, School of Life Sciences-ni Dean ong·eba kamko ka·engachim ine janapatengon, Prof Saha-ko ku·mitdu ra·anina rim·aniara NEHUTA-nasan ong·aigija university aro chatro chatrirangnaba namgija bimingko ra·baani ong·aha ine Prof Kma parakataha.
Kakketko ma·sina gita Guwahati-ni CBI-ko name sandirokchina didiatengon, songbadrango janapani gitade, Prof Saha-ko ku·mitdu ra·mitingon rim·na man·aha ine NEHUTA-ni president parakataha.
Prof Saha, ia 2025 bilsini December 31 tarikon kamoni neng·takangna siengahani gimin da·o uko rim·aniara namen dukni ong·aha ineba Prof Kma aganaha.
Ong·gija dakgipa manderangnade, uamang association-ni membor ong·genchimoba uamang chakpaaniko on·na man·jawa ineba NEHUTA-ni president parakataha.