SHILLONG: Meghalaya a·doko skanggipa changna Health Summit-ko Sombar salo, Shillong songjinmani State Convention Centre-o ong·atangaha aro ia Summit ba tom·anio, a·dokni Chief Minister Conrad K Sangma, a·dokni Health Minister Ampareen Lyngdoh, dingtang dingtang hospital-rangni dilgiparang, doctor-rang, sanna banani a·bao kam ka·giparang aro dingtang dingtang official-rangba bak ra·angtokaha.
Ia Health Summit-o bakko ra·e a·dokni Chief Minister, jinmana aganprakengon, sanna banani kamrangko nambatatna sorkarini ka·enggipa kamrangni gimin janapangenba, ia Health Summit-ara sanna banani kamrangna tangka paisa chamaniko nipilanisan ong·aigija, sanna banani kamrango tangka paisarangko koros ka·anichi manderangna mai namgnirangko on·na man·enga, uani bidingo chanchirimanisa ong·a ine parakangaha.
Sanna banani kamrango sorkarini mongsonggipa kamrangko janapatengon, batanggimin bilsisnini gisepo sorkarini chu·sokatgipa kamrangni bidingo Chief Minister, jinmana agan-talatanirangko on·angaha.
Chu·gimik budget-oni 8 percent-na baten sanna banani aro an·seng baljokani kamrangna chamenga ine janapatengon, ian a·song gimiko bang·bate tangka paisa chamani ong·enga ine Sangma aganaha.
Nursing ba simsak nirokani kamrangko sagipa manderangna simsak nirokanio krong gita ong·a ine toe aganangengon, nursing education ba simsak nirokanirangko skie on·na gita sorkari bang·en tangka paisarangko koros ka·enga ine Chief Minister parakataha.
India a·songna agreba, Japan, Germany, UK, Singapore aro UAE gita dakgipa gipin a·songrango kamrangko ka·atna gita a·dok sorkari, Meghalaya State Skills Development Society (MSSDS) aro gipin dolrang baksa bakrime, nurse-rangna gital institute-rangko kuliengaha ineba Chief Minister parakataha.
Ia tom·anio a·dokni Health Minister Ampareen Lyngdoh-ba jinmana aganprakengon, ia Health Summit-ko ong·ataniara, maikai Meghalaya a·doko sanna banani kamrangko nambatatna kam ka·enga, iako mesokanian ong·enga ine aganaha.
Ia Health Summit-ko ong·atanio, sak 164 staff nurse-rang aro sak 78 Auxiliary Nurse Midwife (ANM)-rangna dingtangmancha appointment letter-rangkoba a·dok sorkari suale on·angjolaha. Una agreba National AYUSH Mission-ni ning·o sanna banani kamrangko nambatatna gita sak 181 AYUSH professional-rangkoba kamo ra·aha.
