Nikrikgipa me·chikko police-rang sing·sandigen
SHILLONG: Madhya Pradesh a·dokoni re·bagipa Raja Raghuvanshi-ko so·otanina uni jikgipa Sonam aro gipin sakbri manderangko da·o Meghalaya Police sing·sandiengkuon, Sonam-ni Uttar Pradesh a·dokona re·ange Ghazipur police-rangna bame on·ena skang, uko UP a·dokni me·chik saksa, mande sakgni baksa bus gario nikrikahani gimin police-rang, da·o ia me·chikkoba sing·sandina miksongenga.
Ua somoio Sonam-ko nikrikgipa me·chikara Ghazipur-ni chatri Ujala Yadav ong·a aro uni aganani gitade, ua somoio ua, Sonam baksa bus gario apsan songreangaha.
Ia me·chikkoba police-rang sing·sandigenma ine sing·on, nangani kri police-rang, badita sakkirangko man·a, ua pilakkon sing·sandigen indiba da·o dipet ia me·chikko police-rang okamatkuja ine East Khasi Hills a·jani Superintendent of Police (SP) Vivek Syiem parakataha.
Koborko on·ani gitade, ua somoio ia me·chik, Sonam-ni Ghazipur-o police-rangna bame on·ena skang, mikkang katipgipa mande sakgnini, Sonam-ko Varanasi Cantonment Station-ona dilange donako nikrikaha. Ua somoio Sonam-ko me·asa sakgni bus stand-ona dilange dona ine ia me·chikni agananiara kakket ong·bebea ong·ode ia case-na police-rang, ia me·chik aro gipinrangkoba sing·sandiangkuani cholrang dongskaengaha.
Raja-ko uni jikgipa Sonam, uni mikchagipa Raj Kushwaha aro gipin sakgittam manderangko tik ka·enba so·ote galaha ine da·o dipet police-rangna, matnanga man·gipa manderang ku·rachakahachim.
Koborko on·ani gitade, ia me·chik baksa bus gario songreangengmiting somoio Sonam, Ghazipur-ode ua neng·takna miksongjaenga ine Gorakhpur-ona badita chel·kuenga, bus gario apsan songrerimskarango sing·joljolangahachim. Iana skang police-rangba, Sonam-ko Nepal a·songchi katangna miksongani dongachim ine a·kangaha.
