Sonam-ko porikka ra·e nina MIMHANS-ona rimanga
SHILLONG: Madhya Pradesh a·dokoni re·bagipa tourist Raja Raghuvanshi-ko so·otanina matnanga man·gipa uni jikgipa Sonam aro gipin sakbri manderangko Meghalaya Police-ni ning·o done sing·sandianirang Sombar salo saldok gapaha aro ia manderangko sing·sandianio police-rang, bilakgipa sakkirangko mesokna rake kamko ka·enga ine Sombar salo, a·dokni Director General of Police (DGP) Idashisha Nongrang parakataha.
Ia a·selna matnanga man·gipa sakbonga manderangko salchetna police-rangni jako kachari pakwate on·ataha aro uandaken police-rang, a·bachengaonin ia manderangko sing·sandie, kakketko ma·sina man·engaha.
“Matnanga man·gipa manderangko salchetna kachari police-rangni jako on·aha aro chinga ia manderangko da·oba sing·sandiengkua. Man·a dipet chinga sakkirangko chimongenga aro ia manderangni kosako bilakgipa case-ko kacharina mesokna jotton ka·enga,” ine DGP aganaha.
Ia manderangni kosako police-rang, chu·onga gitan sakkirangko man·aha ine janapatengon, “Chinga somoi gitan ia case-ko sandirokna aro dos dakgipa manderangni kosako chargesheet ka·na ka·dongenga,” ine Nongrang aganaha.
Matnanga man·gipa manderangko a·sel ong·gipa biapona rimange sing·sandiani bidingo janapatengon, “Da·o dipet sal aro somoikode chinga name aganna man·kujaenga indiba chinga ia manderangko Mongolbar salni bakon a·sel ong·gipa biapona rimange sing·sandina miksongenga,” ine DGP parakataha.
Raja Raghuvanshi-ni manggisiko June-ni 2 tariko, Wei Sawdong Falls sambao donggipa a·kuangaoniko man·ahani gimin ia a·selni bidingo matnanga man·gipa sakbonga manderangko, ia biaponan rimange uamang maikai Raja-ko so·otahachim, uarangko police-rang sing·sandina sienga.
Indake ong·engon, ia a·selni bidingo matnanga man·gipa aro so·ota man·gipa Raja-ni jikgipa Sonam-ko Sombar salo, psychiatric evaluation ba gisikni gita porikka ra·e nina police-rang, Meghalaya Institute of Mental Health & Neuro Sciences (MIMHANS)-ona rimangaha.
“Sonam-ni gisikrang namkuenga, iako porikka ra·e nina MIMHANS-ona rimangaha. Iako doctor-ni ku·pattianio pangchake police-rang dakaha,” ine East Khasi Hills a·jani Superintendent of Police (SP) Vivek Syiem, kobor ra·timgiparangna parakataha.
Uni gisiko maiba ong·gijani ba saanirang dongama ine sing·anina aganchakaniko on·angskaengon, “Ian porikka ra·anisan ong·aia. Police-rangni ning·o donako man·engmiting somoio uni gisikrang tik ong·ama ong·ja uko nina dakanisan ong·aia,” ine Syiem aganaha.