BAGHMARA: Budbar salo, South Garo Hills a·jako man·aoni bilsi 33 gapaniko maniangaha aro ia manianio a·dokni Chief Minister Conrad K Sangma, mongsonggipa sokgipa ong·e bak ra·angaha.
Ia salko manianio, a·dokni Power Minister AT Mondal, Sports Minister Shakliar Warjri, PHE Minister Marcuise N Marak, Education Minister Rakkam A Sangma, Mahendraganj MLA Sanjay A Sangma, Baghmara MLA Kartus Marak, Chokpot MLA Sengchim Sangma, GHADC-ni Chief Executive Membor Albinush Marak, South Garo Hills a·jani dingtang dingtang officer-rang, chatro chatrirang aro gipinrangba bak ra·angtokaha.
Ia salko manianio a·dokni Chief Minister, jinmana aganprakangengon, South Garo Hills a·jani bilsi 33 gapahani gimin a·jani manderangna namgipa skanirangko on·angenba, South Garo Hills a·jao namroro silroroaniko ra·bana ka·enggipa sorkarini kamrangni gimin aganangaha.
South Garo Hills a·jako ru·utbea bilsirangna galchipaha ine janapatengon, 2018 bilsionin South Garo Hills a·jao namroro silroroaniko ra·bana gita ia sorkari, gong crore 1400-ni dingtang dingtang project-rangko ra·bae on·aha aro da·o re·baenggipa bilsigni ba bilsigittamni gisepon gong crore 400 tangkarangko World Bank scheme-ni ning·o chamdapangkugen ine Chief Minister, ku·rachakaniko on·angaha.
“2018 bilsio angni Baghmara-ona re·baani somoio anga South Garo Hills a·jako an·tangni bil ama gita namdapatna jotton ka·gen ine ku·rachakaniko on·aha aro chinga South Garo Hills a·jana nangchongmotenggipa kamrangko sulsul see ra·enba, batanggimin bilsisnini gisepon chinga gong kror 1400-ni project-rangko ra·bana man·aha,” ine Sangma aganaha.
South Garo Hills a·jao namroro silroroaniko ra·bana gita sorkari gisik on·e kamko ka·enga ine janapatengon, “Da·alo an·ching South Garo Hills a·jani ka·sine dingtangbaroroengako nikna man·engaha aro a·jani manderangna cholrangko on·engaha,” ine Chief Minister parakataha.
Meghalaya a·dokni bilsi 60 gapaniko manina tarisoengahaon, pilak biaprangon apsan namroro silroroaniko ra·bana gita sorkari kang·kare kae kam ka·enga ineba ua aganaha.
South Garo Hills a·jao nitogipa aro ong·telaigipa biaprang bang·ani gimin aganangengon, samtangtango donggipa buring bolgrimrangko aro chiring chibisikrangko ripinge rakkiangkuchina gita Chief Minister, South Garo Hills a·jani manderangko didiangaha.
South Garo Hills a·jani bilsi 33 gapaniko maniani bak gita Captain Williamson Government Higher Secondary skulna gital nokko rikna gitaba Chief Minister-ni jakchi pangchakaniko songe on·angjolaha.
Ia gital skul nokko gong kror 7 tangkarangchi rikna sienga.
Ia bilsini SSLC aro HSSLC porikkarango name chu·sokgipa skulrangna aro chatro chatrirangna dingtangmancha certificate-rangkoba Chief Minister, Education Minister aro gipin dilgiparangni jakchi suale on·angaha.
Ia tom·anio a·dokni Chief Minister, Meghalaya Economic Inclusive Program (M-EIP) aro CM Fellowship-koba a·bachengate on·angaha aro MegCARE-ni namgniko man·enggipa manderangna dingtangmancha cheque-rangkoba suale on·angjolaha.
