TURA: India sorkarini Information & Broadcasting Ministry-ni ning·o donggipa Central Bureau of Communication, Field Office Tura-ni gita Budbar salo, Swachhata Hi Seva, Ek Ped Maa Ke Naam aro Nasha Mukt Bharat Abhiyaan-ni Special Outreach Program-ko East Garo Hills a·jani Samanda Block ning·o donggipa Rongsakgre UP School-o ong·atangaha.
Ia program-ko ong·atanio, School Managing Committee (SMC)-ni president Terendro K Marak, jinmana aganprakengon, samtangtangko pangnan rongtal an·tale rakkichina aro skatang jabolrangko galramramjachina, songni nokni manderangko aro skulo poraienggipa chatro chatrirangko didiangaha.\
Samtangtango ong·telaigiparangko aro bol wa·arangko ripingchina gitaba ua didiangaha.
Ia tom·anio, Rongsakgre UP School-ni headmaster Balmit Ch Marak-ba, program-o bak ra·giparangna aganprakengon, a·songko aro an·tangtangko rongtal an·tale rakkina nangani gimin aganangenba, ding·a batroroenganiko komiatna gita bolrangko ge·dapchina didiangaha.
Meghalaya a·dokko ta·makkuoni jakgitel ong·atna gita ta·makkurangoni chel·e dongchina gitaba ua songni manderangko aro chatro chatrirangko didiangaha.
Ia program-ko ong·atanio aganprakanggipa gipin manderangara, skulni skigipa Dillipson Ch Marak, sakgipin skigipa Jesabella D Momin, skigipa Derian Tangrik D Sangma aro gipinrang ong·a.
Ia program-ko ong·atanio, Swachh Bharat Abhiyan aro Nasha Mukt Bharat Abhiyan-ni ku·mikchetanirang baksana, rongtalatani aro bol ge·anirangkoba dakangaha.
‘Ek Ped Maa Ke Naam’-ni bak gita ia program-ko ong·atanio, Gasampe bol chararangkoba jinmana suale on·angaha.
Ia program-ko ong·atanio quiz competition-koba ong·atangaha aro bak ra·giparangna boksisrangko suale on·angaha.
