SHILLONG: Garo Hills Autonomous District Council (GHADC) election-ko re·baenggipa 2026 bilsini a·bachengachibara ong·atna siengon, ia election-o Congress dol, National People’s Party (NPP) baksa bilaken susagrikna ku·rachakaniko on·angaha.
Meghalaya Pradesh Congress Committee (MPCC)-ni working president Deborah C Marak-ni parakatani gitade, re·baenggipa GHADC election-o NPP baksa bilake susagrikna Congress dol, pilak bipekrangon aro block committee-rangko gital dake songpiltaiaha.
“Constituency ge·antion chingo Block Congress Committee (BCC) donga aro BCC gita chinga party-ko bilakbatatna songadam nokadamrangoba kamrangko ka·engaha,” ine Marak aganaha.
GHADC election-o susana Congress dol tariaha ine janapatengon, ia election-na candidate-rangko August ba September jaoni sandina a·bachenggnok aro susana sikenggipa candidate-rangkode election-o susana okamgen ine Marak parakataha.
Garo Hills-o Congress dol bilgribejok ine NPP-ni agananiko jegalatengon, batanggimin chang MP election-oba Congress dol, Garo Hills-o donggipa dak 24 Assembly constituency-rangoni dam 22 constituency-rango cheaha aro Congress dolna kam ka·enggipa pilakan, constituency ge·antion rakbee kamrangko ka·enga ine MPCC-ni working president parakataha.
Dingtang dingtang a·selrangchi Congress dol bilgri ong·engnaba dongaha indiba onbatsranggipa gadangonin Congress dol rakbee kamrangko ka·enga aro re·baenggipa election-o dingtanganikode nikna man·gen ineba ua aganaha.
NPP-o tangka paisa aro bilrang donggenchimoba, ia election-o Congress dol, chegipa ong·na uamang baksa bilaken susagrikna sienga ine Marak parakataha.
GHADC election-ko re·baenggipa 2026 bilsini February ba March jao ong·atnaba gnang aro pilak political dolrangan da·o campaign-rangko ka·na a·bachengtokengaha.
