TURA: Tura-o Additional Secretariat Complex-ko gong kror 156 korosrangchi rikna gita Bristibar salo, a·dokni Chief Minister Conrad K Sangma-ni jakchi pangchakaniko songe on·angaha.
Additional Secretariat Complex-ko rikna pangchakaniko songe on·anio, Meghalaya Assembly-ni Speaker Thomas A Sangma, Deputy Speaker Timothy D Shira, Deputy Chief Minister Sniawbhalang Dhar, Power Minister AT Mondal, Health Minister Ampareen Lyngdoh, PHE Minister Marcuise N Marak, Sports Minister Shakliar Warjri, Education Minister Rakkam A Sangma, Tourism Minister Paul Lyngdoh, Fisheries Minister AL Hek, Cooperation Minister Comingone Ymbon, Garo Hills-ni MLA-rang aro dingtang dingtang sorkari officer-rangba dongpae bak ra·angaha.
Tura-o Additional Secretariat Complex-ko rikna pangchakaniko songe on·anganio a·dokni Chief Minister, jinmana aganprakangengon, ian a·dokna aro mongsongbate Garo Hills-ni manderangna gisik ra·beani sal ong·enga ine janapangenba, ia Additional Secretariat Complex-ko rikaniara building complex-kosan rikenga ong·ja indiba manderangni nangnikaniko chu·sokataniba ong·enga ine parakataha.
Chief Minister-ni aganani gitade, Garo Hills-ni manderang, sorkarini dingtang dingtang kamrangna Shillong-onasa re·na nangengani a·sel neng·nikanirangko chagrongna nangronga aro ia Additional Secretariat-ko Tura-o rikaniara, Garo Hills-ni manderangna, sorkarini dingtang dingtang kamrangko ka·anio altubatataniko on·gnok.
Shillong-o rikenggipa gital Secretariat-ni bidingo janapangskaengon, re·baenggipa bilsi 100-na niksamsoani gnangsa ia sorkari, kamrangko ka·enga aro ia nokrangko rikanichi sorkarini kamrangko manderangona sepangbatasan ong·aigija kamrangkoba altubatatgnok ine Chief Minister parakataha.
“Garo Hills-o rama jal·langrang namjani gimin aro pilakni gitan namroro silroroanirang dongjani gimin bang·a manderangan suk ong·gijaniko paraktokengachim indiba da·alo MDA sorkari, Meghalaya a·dokko a·songo nambatsranggipa a·dokrangoni damsa ong·atna niksamsoani gnang kamrangko ka·engaha,” ine Sangma aganaha.
A·dokni pilak a·jarango aro block-rangon gital office-rangko rikna tangka paisarangko chamataha aro da·alo block office, police station aro pilakon dingtanganiko nikna man·engaha ineba Chief Minister parakataha.
Chief Minister-ni aganani gitade, ia Additional Secretariat-o damgittam complex-rang donggen aro ia damgittamoni Chief Minister complex-kode 2027 bilsini January jaon matchotna nisan donenga.
Ia Additional Secretariat-o Chief Minister, Cabinet Minister, Chief Secretary aro gipin dal·dalgipa officer-rangnaba kuturirang donggen aro ia complex-o dingtang dingtang sorkari department-rangnaba kuturirang donggen.
