TURA: Tura-oni Chokpot-ona dakanggipa ramani Rongku dolongko bilsi 12 ong·pilahaoba matchotchipkujaenga ine Chokpot-ni nangrimgimin NGO-rang parakatenba, jolo songdongenggipa manderangni namgnina aro ramako re·ruraenggipa manderangni namgnina ia dolongko ta·rake matchotatchina dabiangaha.
Chokpot NGO-rangni parakatani gitade, ia Rongku dolongko 2013 bilsionin rikna a·bachengahachim aro da·o 2025 bilsi ong·pilahaoba matchotkujaengachim.
“Chokpot jolo songdongenggipa manderangni badi ka·anirangko man·e chinga Chokpot jolni nangrimgimin NGO-rang, ia dolongko nina re·angaha aro ia kamko ka·enggipa contractor-ni kamna namen suk ong·nikjaha. Ia dolongko rika matchotkujaengani a·selan Chokpot jolni manderang, re·a doanirango neng·nikanirangko chagrongna nangtokenga,” ine Garo Students Union (GSU) Chokpot regional unit-ni president Jish A Sangma parakataha.
Ia dolongko rikenggipa contractor-ko black list ka·china PWD department-ko didiatengon, jolo songdongenggipa manderangni namgnina ia dolongko ta·raken matchotate on·china gita NGO-rang, sorkariko mol·molataha.