SHILLONG: Garo Hills a·jao a·dokni skanggipa medical college-ko sorkarini ta·rakate kam ka·ani ning·o Medical College rikenggipa biapona Health Minister Ampareen Lyngdoh Sukrobar salo re·ange nieaha.
Unbaksa a·gipi official-rangba re·angchapaha, rika cho·anina nangdapkuenggipako niangaha, chu·sokatna nangkuenggiparangna minister agangrikangaha aro chu·sokna bang·gijagipako ta·rakatchina jedakode gamchatgipa project ru·utatako man·jawa ine minister aganaha.
Da·o rikenggipa gadangko nipilaniko dakangaha, rika cho·ani skanggipa gadang 75%-ni gita matchotaha aro rika cho·ani gnigipa gadangko man·a dipet ta·rakatenga, ine Minister-na official-rang agan-talate on·aha. Chiko salbana tarigiparang medical college rikgipa biapona sokbamanaha aro iako ta·raken chalaiatna ka·dongsoenga, mikkangchi operation-na nanggiparang bosturangko biaprango donangna man·a ka·dongsoenga.
Mongsong nangchongmotgipa rama tarianggipa km 1.7-ko matchotatna 70%-ni gitasan nangaiaha. Ia raman institution-ona mongsong dakanggipa rama jekon da·o kam ka·mitingoba jakkalenga aro mikkangchi college kuliani somoioba iakon jakkalanggen.
Electrical Substation (ESS) building nokko rika matchotaha indiba 33KVA power line-ni gita biljoliko salbanasan sengaiaha. Meghalaya Energy Corporation Limited (MeECL)-chi sale on·ani ja·man Finance Department-o tangka gamangna kamrangko ka·engani ning·o ong·enga jean nangchongmotgipa file ong·a oine official-rang talataha.
Project-ko matchotatna 2025 bilsini December jako donachim indiba kamrang matchotsrangkujaengani a·sel 2026 bilsini March jaona ra·doataha.
A·jao nambatgipa medical edcation-na rika cho·aniko on·angna sorkarini on·kanggipa ong·enga ine niani ja·man Sangma aganangaha.
College-ko jensalo matchotgen Garo Hills-oni medical-na poraina sikenggiparangna academic aro professional cholrangko bilakdapatasan ong·aijawa indiba Meghalaya a·dok gimiko namgbatgipa sana bananiko on·a bilakdapatako man·gen, ine ua agandapangaha.
“Garo Hills a·jao namabata sana bananiko on·angna aro medical education-ko bilakdapatna an·chingni sorkari on·kanga,” ine Lyngdoh aganaha.
Garo Hills-o medical education-o bangbang ong·enggipako gapatna ian mongsonggipa institution ong·e dangdike on·a medical college-o ka·dongsoenga aro education aro sana banani ia minggnina gipin a·palchina re·anganikoba komiatgipa ong·gen, ine parakataha.
