SHILLONG: Meghalaya-o Indo Bangladesh-ni 443 kilometer sima arini kilometer 59 simako kapenga matchotkuja. Border Security Force, Meghalaya-o Indo Bangladesh sima ariko kapengani kamko ta·raken matchotatna jotton ka·enga.
Bangladesh-oni bang·en manderang Meghalaya-ni sima ari gita niamgri napna jotton ka·giparang bang·akon rim·aha.
Uni gimin BSF, sima kapenga matchotgijagipako ta·raken matchotatna nangnikenga ine Border Security Force (BSF), Meghalaya frontier Inspector General O.P. Upadhyay aganaha.
Simako kapengna kam ka·anio BSF, a·dok sorkariniko chu·gimik dakchakaniko man·enga. Chief Minister an·tangba Indo Banglades sima ariko chu·gimik kapengako nangnike nirokenga.
Meghalaya, Bangladesh baksa km 443 sima nangchapa. Indiba mitam jolrang sima ari kapengako jegaltokaha. Fencing-ko ba silchek kapenganiko zero line-oni a·bachengna nanga, India-ni a·jani ning·o ga·akgipa 150 yard-oni a·bachengna nangja, indake ong·ode bang·en a·arangko gimatgen ine jegaltokaha.
Mejaomangmangsan BSF Inspector General, Chief Minister Conrad Sangma-na sima ario chelchakani, badingsrukani ba uandakgiparangni bidingo u·iate, iarangko champengna gita BSF aro a·dokni agency-rang bakrime kam ka·na nangnikaniko chanchirimaha.
