SHILLONG: Meghalaya Shillong-ni Principal Accountant General (A&E), Finance (Pension Cell) Department bakrime, Shillong Malki-ni Basic Traning Centre-o Pension Adalat-ko ong·atao matchotgija donchipga ming 85 case-rangko nipilangaha.
Sorkari kamrangoni neng·takgiparangni somoi gita pension-ko man·gija donggiparangni neng·nikarangko bon·atna miksonganio ia pension adalat-ko ong·ataha.
Tom·anio Drawing and Disbursing Officers (DDOs), pensioner aro official-rang bakko ra·aha. Adalat-o case mingantikon daitoko jako ra·e kam ka·gipa officer-rangni mikkango name dake nirokangaha.
Pension Adalat-o Finance Department-ni official-rang aro DDOs-na Pension Rules ba niamrangni bidingo agan-ku·pattie on·aha. Indake session-o adita ming case-rangko bon·atna chu·sokaha.
Indiba mitam case-rangko bon·atna man·teljaha. Ua case-rangko bon·atgnok.
Uandake Pension Adalat-o bang·bata case-rangon kam ka·giparang uamangni service-ni somoio nomination-ko gapatjani a·sel pension-ko man·a neng·nika man·giparango nikna man·aha. Ia nomination form dongjani a·sel case-ko bona·tna man·jaha.
Iarangni gisepon Principal Accountant General, Finance Department-ko gimik DDO-rangko sorkario kam ka·giparangni nomination form-ko retirement-na skangan chimongchina ge·etna agan-ku·pattiaha.
