SHILLONG: Indore songjinmaoni re·bagipa tourist Raja Raghuvanshi-ko Sohra jolo so·otani ja·man, Meghalaya a·dokko aro a·dokni manderangko ong·gija dake matnanggipa mitam national media-rang aro manderangni kosako Rajya Sabha-ni gitcham MP Rakesh Sinha raken jegalataha.
Ia a·selni bidingo tale ma·sichenggija Meghalaya a·dokko matnangna jotton ka·ahani gimin Sinha, ia media aro manderangko raken jegalataha.
“Raja Raghuvanshi-ni case-na Meghalaya-ko matnanganiara namen namjabatsranggipa kamko ka·a gita ong·aha maina na·simang, tom·tomaniko namnikgipa manderangkosa matnangaha. Ian bebera·na amgijani ong·a,” ine 2023 bilsio Kongthong songko nirokna jako ra·gipa gitcham MP aganaha.
Meghalaya a·dokona re·baronggipa ong·e ua Meghalaya a·dokko songsalna, political-ni kamrangna aro jatni daka rikanirangnaba mittelpile aganaha.
“Je manderang aro media-rangan, ia a·selna Meghalaya a·dokko matnangahachim, na·simang kemako bi·na nanga aro a·dokni namgipa kamrangko a·gilsakna mesokna nanga,” ine Sinha aganaha.
Meghalaya a·dokni gimin an·tangni nikani aro chanchianiko janapatengon, “Meghalaya a·dokara tom·tombatsranggipa a·dok ong·a aro ia biapo manderang pilakan tom·tomao janggi tanggiparangsa ong·a. Anga batanggimin jadokonin Meghalaya a·dokona re·bae, diltubatsranggipa songrangonaba re·ange manderangni kamrangko nienga aro manderangna dingtang dingtang kamrangni giminba skie on·engba. Anga manderangni bang·en dakchakaniko man·enga,” ine gitcham Rajya Sabha MP aganaha.
Meghalaya a·dokni chadamberangni gimin janapatskaengon, “Chadamberang kamrangko aro dilgipa ong·na cholrangko sandienga aro anga chanchia gital ramako mesokna gita chadamberangna dilgipa ong·na cholko on·na nanga,” ine Sinha aganaha.
 |
ReplyForward
|