TURA: 2023-2024 bilsini Performance Grading Index (PGI) ranking-o Meghalaya a·dokni bon·kamgipa biapko man·anian lekka porani kamrango NPP-chi dilenggipa MDA sorkarini chu·sokgijaniko mesokani ong·aha ine Meghalaya Pradesh Youth Congress (MPYC) matnangataha.
2023-24 bilsini PGI ranking-ko Union Education Ministry-ni mesokani gitade, ia PGI-o Meghalaya a·dok, national category (Grade Akanshi-3)-o 417 point-rangkosan man·e, a·song gimiko bon·kamgipa biapko man·ahachim.
Iani bidingo a·dokni Chief Minister Conrad K Sangma-chi dilenggipa MDA sorkariko matnangatengon, “PGI ranking-o iandake a·dokni bon·kamgipa biapko man·aniara a·dokni chadamberangna lekka porako on·anio MDA sorkarini chu·sokgijaniko mesokanian ong·enga,” ine MPYC-ni president Timjim K Momin parakatenba, ian lekka porani kamrango tangka paisa jakkalsretani aro ku·chakatangko chu·sokatgijaniko mesokaniba ong·a ine matnangataha.
MPYC president-ni parakatani gitade, a·doko lekka porako tang·doatna changni chang a·dok sorkari ku·rachakanirangko on·ahaoba da·alonan skulrango ritchani ritcha skigipani kamrang bangbang ong·e dongkuenga aro bang·bata skulrangan, mongsongbate songadam nokadamrango skul nokrangni namgijanirangko, bijoli gri, toilet gri, aro maming cholrang gri ong·aniko nikna man·kuenga.
Skigiparangna training on·anirang dongja, somoi gita dormaharangko on·ja aro gipin nanga dakchakanirangko on·jaengani a·selan skigiparang neng·nikanirangko chagrongna nangtokenga ineba Momin parakataha.
PGI ranking-o Meghalaya a·dokni tang·dogijaniara a·dok sorkarini chu·sokgijaniko aro a·dokni chatro chatrirang, ma·a paarang aro skigiparangko cha·bokani gita ong·a ine janapatskaengon, ia bilsini SSLC porikkao pass percentage-ni 87.10% gapaniara, ia sorkarini chu·sokgijanirangko dongnuna, bakkandikgipa ramako sandianikosa mesokani ong·a ine MPYC-ni president matnangataha.
“SSLC porikkao pangna bilsian 55 ba 57%-mangni gitasan chatro chatrirang pass ka·rongaiachim indiba ia bilsio a·dok sorkarini ra·gatgipa ‘CM IMPACT’ guidebook-chi 87.10% ong·pile chatro chatrirang pass ka·na man·aha. Iako bang·bata skigiparang aro u·i-ma·sigipa manderangan, ‘cha·bokani’ inesa agantoka maina SSLC porikkao sorkarini on·gipa guidebook-rangonikosa sing·anirangkoba ra·aha,” ine Momin parakataha.
Indake ong·engon, State Education Commission (SEC)-ni sandie man·anirangko, ku·pattianirangko aro biterangko jinmana parakchina, ‘CM IMPACT’ guidebook-ko jakgitele nipilna gita cholko on·china, skigiparangna bilakgipa training-rangko ong·atchina, bangbang ong·e dongenggipa skigipani kamrangko gapatchina aro Education department-ni gita skulrangko re·e nirokjringchina gita MPYC dabiangaha.