TURA: Songadam nokadamrango lekka porako tang·doatna gita Mothers Union-ni Project COME (Community Onward Movement for Education)-ko Sonibar salo, Tura-ni Mission Compound-o donggipa Working Women’s Hostel-o a·bachengataha.
Ia tom·aniko Tura Don Bosco College-ni Principal Rev Fr Januarius Sangma-chi Isol bi·e a·bachengataha aro Isolo bi·ani ja·man jinmana aganprakangengon, lekka porako namdapatna gita iandakgipa ja·kurangko de·engani gimin Mothers Union-ko mittelpilangaha.
Ia tom·anio, Mothers’ Union-ni president Sume Chandola B Sangma, rimchaksoani kattarangko aganangengon, ia Project COME-ni bidingo talataniko on·angjolenba, ia songadam nokadamrango skulrangko chalaianio neng·nikanirangko warachakna jako ra·enggipa project ong·a ine parakataha.
Ia project-ara skulrangko bimingmangmangchi deragatasan ong·aigija, pilakni gitan namroro silroroaniko ra·bana jakkandile re·mikkanganisa ong·enga ineba Sangma aganaha.
Ia program-ko ong·atanio, Learning Sanctuary-ni nokgipa aro Headmaster Tyrone D’ Brass-ba jinmana aganprakengon, lekka porako tang·doatna gita ka·dongbee sorkari baksa jak on·ahanina Mothers Union-ko mittelpilangenba, lekka porani kamrango pilakkon bakrimchina didiangaha.
Ia tom·anio Captain Williamson Sangma State University-ni Vice Chancellor Dr Vasanthi Vijaykumar-ba dongpae jinmana aganprakangengon, university-ni ong·atgipa dingtang dingtang program-rangchi ia project-na dakchakanirangko aro bakrimaniko on·na ku·rachakenba, chol ong·gijagipa skulrangko tang·doatanio pilak institute-rangkon bakrimchina didiangaha.
Ia tom·anio gitcham Education Commissioner Lutherine R Sangma-ba dongpae aganprakangengon, sorkari skulrango chagrongna nanggipa neng·nikanirangko janapangenba, ia Project COME-ara, iandakgipa skulrangna bang·en dakchakani ong·gen ine an·tangni ka·dongchakenganiko parakangaha.
Ia Project COME-ko a·bachengatanio dongpae bak ra·anggipa gipin manderangara State Early Childhood Care & Education Program-ni Coordinator Singje Ch Marak aro gipinrang ong·a.