SHILLONG: Re·baenggipa 2027 bilsio sokachakna sienggipa National Games-na tarisamsona man·na gita a·dok sorkari, gimik dol 26 sports association-rangna gong kror 39.17 tangkarangko on·na tik ka·angaha.
Iani bidingo jinmana parakatengon, “2027 bilsio sokachakenggipa National Games-na tarisamsona man·a gita a·dok sorkari, gong kror 40 gapna sipile, dingtang dingtang sports association-rangna on·na tik ka·angaha aro ia dolrang, an·tangtangni kal·susagiparangna dingtang dingtang nanga bosturangko aro kal·chakram biaprangko tarisona man·gen,” ine Mongolbar salo, a·dokni Chief Minister Conrad K Sangma parakataha.
Batanggimin changrango National Games-rangko ong·atanio a·dok sorkarisa koros ka·rongbataia ine gisik ra·atpilaniko on·angengon, “Kal·susaanio bak ra·na sienggipa dingtang dingtang dolrang, an·tangtangni gita nambate tarisamsona man·na gita Meghalaya sorkari, ia chango a·dokni dingtang dingtang sports association-rangna nanga korosrangko on·e dakchakna tik ka·aha,” ine Chief Minister parakataha.
Kal·susaenggipa manderangna bang·en dakchake on·anirangko nangkuenga ine janapatengon, “Kal·susaanio bak ra·na sienggiparangoni bang·batan chatro chatrirang aro sorkario kam ka·giparangsa ong·gen, uni giminsa ia kal·susagiparang, re·baenggipa bilsignini gisepo an·tangtangko tarisamsoanio, kamrangko aro poraianirangko galjana gita sorkari, dingtang cholrangko ra·gatgen,” ine Sangma aganaha.
Meghalaya a·doko nambatsranggipa kal·chakram biaprangko tarina sorkari, gong crore 1900-na baten tangka paisarangko koros ka·enga ine janapatskaengon, ian mikkangchi a·dokni chadamberangna, kal·susaanirango chu·sokgiparang ong·na dakchakgen ine Chief Minister parakataha.
Uttarakhand a·doko chang 38-gipa National Games-ko ong·atanio Meghalaya a·dokni kal·susagiparangba medal ge·bongako chebana man·aha ine janapatskaengon, “Ia changode chinga medal man·aniko chang 10-chi bariatna nisan ka·engani gimin komibeoba ge 50 medal-rangna nisan donenga. Ian rakbegipa kam ong·gen indiba an·ching re·mikkangengon, rakgipa nisanrangko donesa re·mikkangna nanga,” ine Sangma aganaha.