SHILLONG: National People’s Party (NPP)-chi dilenggipa Meghalaya Democratic Alliance (MDA) II sorkariko chalaiani da·o bilsigni ata gapna siengahaon, a·dokni Cabinet-ko sualpiltaiani cholrang donga ine bang·a manderangan chanchichiptokenga.
Iani bidingo sing·anina aganchakaniko on·angengon, Cabinet-ko nipilani giminde a·dokni Deputy Chief Minister Prestone Tynsong mamingkoba aganna gita jechakaha indiba Cabinet-ko nipilani kamde Chief Minister-ni daitosa ong·ani gimin uasa nangani kri ja·kuko de·angaigen ine parakatskaaha.
Mitam media-rangni kobor on·ani gitade, Cabinet-ko sualpiltaigenchimode a·dokni Education Minister Rakkam A Sangma aro Sports Minister Shakliar Warjri-ni biapo gipin minister-rangko seokskanaba gnang.
A·dokni Education Minister Rakkam Sangma aro Sports Minister Shakliar Warjri-ko Cabinet-oniko ra·galani cholrang dongama ine sing·on, iani giminba Tynsong mamingkoba aganna gita jechakaha aro ia pilakan Chief Minister-ni jakosa ong·aia ine parakataha.
BJP-ni sakgipin MLA Sanbor Shullai-ba uni ka·rimska AL Hek-ni biapko Cabinet-o ra·skana senge dongengachim. MDA sorkari II-ni bilsigni ata gapahaon ua Cabinet-o biapko man·gen ine Shullai ka·donge nichakengon, Cabinet-o biap te·sreanide dilgiparangni skaniosa ong·aigen ine Hek aganskaaha.
NPP-ni saksa dilgipa aro Chief Minister Conrad K Sangma-ni adatang James K Sangma-ko Rajya Sabha-ni MP-na mingskana sienga ine koborrangko man·soengani gimin sing·on, da·o dipet iani bidingo party-ni gitade chanchirima dongkuja ine Deputy CM aro NPP-ni state president Tynsong parakataha.
Da·o Meghalaya a·dokni Rajya Sabha MP ong·enggipa WR Kharlukhi, MP-ni kamko ra·piltaina nangnikjaengaha ine aganani ja·man James Sangma-ko Rajya Sabha MP songskana miksongenga ine koborrangko man·soaha.