TURA: Re·baenggipa 2026 bilsini a·bachengachibara ong·atna sienggipa Garo Hills Autonomous District Council (GHADC) election-o Nationalist Congress Party (NCP), dam 29 seat-rangon susana tariengaha.
Iani bidingo u·iataniko on·atengon, re·baenggipa 2026 bilsio ong·atna sienggipa GHADC election-o uamang dam 29 constituency-rangon susana sienga aro iana uamang batanggimin bilsignionin kamrangko ka·soengaha ine Mongolbar salo, Meghalaya State NCP Unit-ni state president aro a·dokni gitcham MLA Omillo K Sangma parakataha.
“GHADC-ni MDC election-o chinga sak 29 candidate-rangko susaatna tarimanaha aro iana chinga bilsignina skangan kamrangko ka·soengaha. GHADC election-na komibeoba 35 percent candidate-rangkode me·chik candidate-rangko susaatchina chingna Delhi-o donggipa headquarter-oni ge·etaniko on·ataha. Uni gimin chinga MDC election-oni a·bachenge MLA aro MP election-rangoba susana da·o dingtang dingtang gadangrango tarimanaha,” ine Sangma parakataha.
Garo Hills-o GHADC election-na skang, dongsogimin office bearer-rangna an·tangtangni joltangtangko nirokna gita ge·etaniko on·ataha ineba NCP-ni state president parakataha.
Sangma-ni u·iatani gitade, vice president Marbindruth Momin, South Garo Hills-ko, vice president Obison K Sangma, East Garo Hills-ko, state working president Indrash Marak, South West Garo Hills-ko, state president Omillo K Sangma, West Garo Hills-ko, district coordinator Enilla D Shira aro Serenni Marak, North Garo Hills-ko aro state women wing president Serimina Marak, me·chik dolrangko nirokangskagen.
Party tikitna dorgasto galani bon·kamgipa tarikko ia bilsini September jana tik ka·aha ineba NCP-ni state president parakataha.
