TURA: West Garo Hills a·jani Selsella Distribution Sub-Division-o an·tangtangni assistant executive engineer (AEE) dongkujani a·sel bijolni kamrangko nirok sandianio neng·nikanirangko chagrongna nangenga ine Selsella-o dingtang dingtang dolrangni nangrime bikotgipa All Selsella NGOs Alliance (ASNA) parakatenba, Selsella Sub-Division-na dingtang AEE-ko on·china Meghalaya Power Distribution Corporation Limited (MePDCL)-ni Director-ko didiataha.
Selsella NGO-rangni parakatani gitade, da·o dipet Selsella Distribution Sub-Division-o Garobadha-ni AEE-sa kamrangko nirokenga aro ia officer, biap damgniko nirokna nangengani a·sel neng·nikanirangko chagrongna nangenga.
“Chinga Garobadha AEE-ni kamrangko jegalenga ong·ja indiba officer saksanchi dingtang dingtang sub-division damgniko nirokaniara namen neng·beani kam ong·ani gimin Selsella Sub-Division-na dingtang AEE-ko on·china mol·molenga,” ine ASNA-ni dilgiparang parakataha.
ASNA-ni parakatani gitade, adita salrangna skangsan uamang, da·o AEE ong·e kam ka·enggipa officer-ko grongenba Selsella jolrango bijoliko name on·na man·jaengani gimin sing·sandion, Selsella-o dongkame kam ka·gipa AEE dongjani a·selsa kamrangko name nirokna man·jaenga ine ma·sina man·aha.
“Uni gimin Selsella-o manderangni jelbra jelsuani aro bijoli nanganiko nie, Selsella Distribution Sub-Division-na dingtang AEE-ko on·china chinga mol·molenga,” ine ASNA, Meghalaya Power Distribution Corporation Limited (MePDCL)-ni Director-na sedoatgipa chittio janapataha.