TURA: Najing Bazar-ni a·a pattako A·king Nokmana u·iatani gri aro Maharini membor-rang baksa maming songgigrikchengani grisa Tura Municipal Board (TMB)-na on·aha ine Tura-ni MDC Bernard N Marak parakatenba, ia a·a pattako den·galpilchina Garo Hills Autonomous District Council (GHADC)-ni Deputy Chief Executive Membor aro Land & Revenue-ni Executive Membor In-charge Nikman Ch Marak-ko didiataha.
GHADC-ni Deputy CEM-na sedoatgipa chittio Marak-ni parakatani gitade, TMB-na on·gipa a·a pattani bidingo RTI ka·e am·sandion, ia a·arangna compensation ba tangka paisa gamskaani maming sakkirangba dongjaha aro a·a ra·anio maming niam ja·rikanirangba dongjahani gimin ian a·kingni a·arangko TMB-ni ra·sekdrana jotton ka·aniko mesokani gitasa ong·aha.
“Iandake niam pe·anirangko nikahani giminan GHADC-ni Revenue Court-ba raiko on·ahachim indiba ia jolrango TMB-ni gita niam gri kajina gile ra·anirangko nikna man·engkua,” ine Tura MDC parakataha.
Iandake a·kingni a·arangko Municipality-ni ra·sekaniara Tribal-rangna on·gimin a·ani bilrangko ra·sekani gitasan ong·aigija bading chiwale cha·enggipa joltangni manderangna tangka paisani gita neng·nikanirangko on·aniba ong·enga ine janapatengon, TMB-na on·gimin Najing Bazar-ni a·a pattako den·galpilchina, TMB-ni niam gri kajina gilanirangko dontongatchina aro Tribal manderangna on·gimin a·ani bilrangko chel·chakchina gita Tura MDC, GHADC-ni Deputy CEM-ko didiataha.