Dalu Block-o PMAY-na VEC secy aro gram sevak tangka gile ra·a: ADIL

TURA: Dalu C&RD Block-ni ning·o donggipa Dingkajora songo, Pradhan Mantri Awas Yojana (PMAY)-ni namgniko man·paenggipa manderangoniko village employment council (VEC)-ni secretary aro gram sevak, tangka gile ra·aha ine A·chik Dedicated Integrity Leaders (ADIL) dol parakataha.
ADIL dolni parakatani gitade, Dingkajora songo PMAY-ni namgniko man·paenggipa manderangni badi ka·anirangko man·soenba uamang songona re·ange, sing·sandianirangko dakon, songo PMAY scheme-ko man·enggipa mande sakantikon, sanikoba gong 500 aro sanikoba gong 1000 ka·e gram sevak-na on·china, VEC-ni secretary an·tangan bi·e ra·angaha ine songni manderang parakataha.
“PMAY low cost nokko rikna bang·gija tangkarangkosan man·paenga aro nok rikna tangka chu·ongjaengani giminan mitam manderangde, wak-matchurangko palenga aro gue baganrangko bondok donna nangenga. Iandake manderangni neng·nikanirangko VEC secretary aro gram sevak nikna mikron dongjama? Manderangni neng·nikanirangko ma·sichakna gisik dongjama? Gram sevak-na sorkari kam ka·chinan dormaha on·enga indide iandake songni nokni manderangoniko maini gimin tangkarangko dabie ra·na nangenga?” ine ADIL dolni dilgiparang sing·doatenba, VEC secretary aro gram sevak sakgnini kamkon raken jegalataha.
ADIL dolni parakatani gitade, VEC secretary-ni term-ba bon·ahani gimin Dingkajora VEC-na gital secretary-ko seokna gita songni manderang changbrina kingking Block Development Officer (BDO)-na chitti sedoatahachim indiba songni manderangkosa ua ka·mikkenatpilaha ineba songni manderang parakataha.
“Saksa officer ong·e, maini gimin ua manderangna dakchakna sikja aro maini gimin songni manderangkosa ka·mikkenatpilna nangaha? VEC secretary-na dongimin term bon·ahani giminsa gital secretary-ko seokna songni manderang election-ko ong·atchina mol·molahachim indide maini gimin election-ko ong·atgija songni manderangkosa ka·mikkenatpangpilenga?” ine ADIL dolni dilgiparang sing·doatenba, BDO-ni iandakgipa kamko uamang raken jegala aro jegalangkugen ine parakataha.
Iani bidingo ADIL dol, nanga gita ja·kurangko de·angkugen aro dos donggipa official-rangni kosako rakgipa ja·kurangko de·china sorkario dabianggen ineba ADIL dol parakataha.