WILLIAMNAGAR: East Garo Hills a·jani Williamnagar jillao, nok rikani aro ma·manti bosturangko cha·uanio jak donggipa adita sak manderangko police-rang rim·na man·aha.
East Garo Hills a·jani Superintendent of Police (SP) SA Rynjah-ni u·iatani gitade, re·anggipa June-ni 11 tarik walo, Williamnagar-ni nok te·sao dongipa nok rikani ma·manti bosturangko cha·uaha ine Williamnagar police station-o FIR ka·aha aro uandaken police-rang, cha·ugipa manderangko am·sandienba, ia bosturangko cha·uanio jak dongna nanga ine potchipgipa mande sakbriko, June-ni 23 tariko rim·na man·aha.
Ia mande sakbriko rim·ani ja·man police-rang sing·sandion, uamangni cha·ugimin bosturangkoba ja·mano police-rang man·pilaha.
Rim·ako man·gipa manderangara, Williamnagar jolo donggipa Dawa Nengkatokgre-oni bilsi 38 ong·gipa Bikan D Sangma, Akelgre-oni bilsi 23 ong·gipa Jetlow R Marak, Dawa Nengkatokgre-oni bilsi 25 ong·gipa Sengba N Marak aro West Khasi Hills a·jani Shallang jolo donggipa Rangram Pattal-oni bilsi 30 ong·gipa Pebiriush G Marak ong·a.
Ia manderangoniko police-rang, 16 mm Iron rod, 12 mm Iron Rod, 10 mm Iron rod, 8 mm Iron rod, CP Plus CCTV Camera, Grinder Machine, LED Monitor, Ceiling Fan aro ML-13A 6609 Bolero Pik-up garikoba man·aha.