SHILLONG: Meghalaya a·doko Inner Line Permit (ILP)-ko ra·gatchina dabienggipani bidingo ma·ming ku·rangko on·jaenga ine matnanganirangko Budbar salo, External Affairs-ni Union Minister of State Pabitra Margherita jegalatenba, ILP-na dabianiko chu·sokate on·na ma·mong sorkari niengkua ine ku·rachakaniko on·angaha.
Shillong-ona re·baanio kobor ra·timgiparangni sing·anina aganchakaniko on·angengon, Meghalaya a·doko dingtang dingtang dolrangni dabienggipa ILP-ni bidingo ma·mong sorkari da·oba cholrangko niengkua ine Union Minister parakataha.
“Salgro salaramni damchet a·dokrango ru·uta bilsirangna matchotgija dongkuenggipa kamrang da·oba bangki dongkuenga. Ia pilak nangnikanirangkon a·songni Prime Minister Narendra Modi-ni dilanichi mingsani ja·man mingsa dake chu·sokatenga,” ine Margherita aganaha.
ILP-na dabiani bidingo Meghalaya Legislative Assembly-oba 2019 bilsion resolution-ko pass ka·ahachim indiba da·alonan iani bidingo ma·mong sorkarioni maming aganchakanirangko on·kujaengani gimin a·dokni dingtang dingtang dolrang, sorkariko matnangtokengachim.
“Kam mingantion neng·nikani aro chanchina nanganirangde dongaia. Ia dabianirangko chinga namao chu·sokatna gitasa name chanchie ja·kurangko de·enga,” ine Union Minister of State aganaha.
Meghalaya a·doko ILP-na dabianikoba ma·mong sorkarini chu·sokatna miksongenggipa kamrango donenga aro iako somoi sokahaon ma·mong sorkari chu·sokatgen ineba ua ku·rachakaniko on·angaha.
Iana skang Union Minister, Prime Minister Narendra Modi-ni dilanichi Good Governance-ni bilsi 11 gapaniko maniani bak gita Shillong songjinmani Raid Laban Secondary School-ona re·ange, bol ge·anio bak ra·epaaha.
Ia program-ko ong·atanio, skulni chagrongna nangenggipa dingtang dingtang neng·nikanirangko skulni principal, Union Minister-na janape on·na cholko man·aha aro Union Minister-ba skulni nanganirangko chu·sokate on·na ku·rachakaniko on·angaha.