SHILLONG: Meghalaya a·doko HIV/AIDS-na simsaksona nangbeani ong·engaha, jeon ia sabisiko man·e sianggipa manderang a·doko da·alona sak 400 ong·nsipilengaha.
Mongolbaro Meghalaya State Network for Positive People (MSNP+)-na Meghalaya Legislative Assembly-ni Speaker-ni on·gipa outreach vehicle ba gariko pakwate on·anio aganengon, Meghalaya a·doko HIV/AIDS sabisiko man·e sianggiparang da·alona sak 396 gapengaha ine Health Minister, Ampareen Lyngdoh parakangaha.
A·doko ia sabisiko sana bananio adita tik ong·gijanirang dongengani gimin suk ong·bregija dake aganengon, HIV man·gipa darang mandeba sana-banani aro sam dawai gri hospitaloni ong·katna nangjana gita Sorkari kamko ka·gen ine Health Minister ka·dongatani kattarangko aganaha.
Healt Minister-ni aganani gitade, drugs-ni gimin a·doko HIV sabisirangko a·doko bariatenga. Unigimin drugs aro HIV-chi neng·nikataniko ra·baenganiko warachaksona gita A·dok Sorkarini Social Welfare Department aro DREAMS Mission dolgni nangrime kamrangko ka·enga.
Indake ong·engon, ia neng·nikatanirangko warachakanio ua a·doko songdonggipa sakantini jak snilpaaniko nangnikanikoba Ma Lyngdoh aganaha aroba jinma nangrime warachakosa indakgipa neng·nikanirangko chel·atna man·gen, unbaksana HIV man·giparangko mitchigja, da·ode kimkro warachakani somoisa ineba ua agandapaha.
Be·entangko pale cha·anian HIV sabisini batrikrikani ja·pang ong·a, iako champengna rake kam ka·na nangenga, Health Minister aganaha.
Unigisepon HIV/AIDS-ni bidingo mongsongbate chanchigrikani dakna gita ge·sa Integrated Health Campaign-ko Sorkari a·bachengataha ine Minister aganaha.
