TURA: North Garo Hills district-ni skotong Resubelparao, Garo Hills Autonomous District Council (GHADC)-ni nangchongmotgipa branch office-ko kulie on·china gita Rongrong constituency-ni MDC Rinaldo K Sangma, Council-ni Chief Executive Member (CEM), Albinush R Marak-ko Butbar salo grongenba mol·molangaha aro kingsa memorandum-koba on·angaha.
North Garo Hills district-o songdonggipa manderang, dingtang dingtang kajinarangko Council-na gamna gita nangengon, Turaona re·angna gita nanga, indake ong·engon, re·a-doanina korosrangko galna nangan baksa somoirangkoba bang·bate nangenga, indake kangal-cholgrirangde namen neng·nikaniko chagrongna nangao ga·akenga. Unigimin East Garo Hills-ni skotong Williamnagar-o GHADC-ni branch office-ko kulia gita apsan dake North Garo Hills-oba branch office-ko kulie on·genchimode district-ni manderang namen rang·spena man·genchim ine MDC, Council-ni CEM-na talataha.
Garo Hills Autonomous District Council (GHADC)-ni branch department-ko Resubelpara-o nangenggipara Land & Revenue Department, Taxation Department, Forest Department, Building Regulatory arnd Development Authority (BRDA), iarangan ong·enga aro District Council Court Circuit Branch-ba mingsa ong·enga, jedakode North Garo Hills-ni manderang Tura re·bana nangjawa. North Garo Hills-ni manderangna sepangbate District Council-ni kamrangko dangdike on·na man·a gita janapgimin Branch Department-rangko kulie on·china Pa Sangma mol·molaha aro uni mol·molaniko CEM ta·raken nirokatna gita ku·chakaha ineba Rongrong MDC aganaha.
