SHILLONG: Indore songjinmaoni re·bagipa tourist Raja Raghuvanshi-ko a·dokni Sohra jolo so·ote galani bidingo police-rang sandirokanirangko dakkuengon, Indore songjinmao Silome James minggipa mande saksako rim·ani ja·man Meghalaya Police-ni Special Investigation Team (SIT), uni dilanichi Indore songjinmani chiring dilsaoniko pistol pongsa, magazine ge·gni aro .32 guli ronggniko baksana gong 50,000 tangkarangkoba man·aha.
Re·anggipa salrangonin Meghalaya Police-ni SIT, tangka paisa aro ma·manti gam-jinrang donggipa bag baksana Sonam-ni mobile phone aro pistol-koba sandiengachim. Sohra-ko Raja-ko so·otani ja·man Sonam, Madhya Pradesh a·dokonan re·angpile Indore songjinmani nok te·sao dongnuchakahachim aro ia nokon ua an·tangni bag-koba donangahachim. Raja-ko so·otanio jak donggipa Raj Kushwaha aro gipin manderangko police-rang rim·aha ine ma·siani ja·man Sonam, June-ni 8 tariko, an·tangni dongnuchakenggipa nokoni re·ange, June-ni 9 tariko, Uttar Pradesh a·dokni Ghazipur-o bame on·eaha.
Indake ong·engon, Budbar salpaksachibara Indore songjinmao rim·ako man·gipa Silome James, police-rangko chiring dilsaona rimangaha aro ua biaponiko pistol aro gulirangko man·aha. Ia mandeo sing·sandiangkuon ja·mano uni I10 garionikoba gong 50,000 tangkarangko man·aha.
Ia tangkarangko ua, Sonam-ni mikchagipa Raj Kushwaha-ni laptop bag-oniko ra·aha ine James ku·rachakaha.
Iani bidingo talataniko on·angengon, laptop bag-kode so·e galakosa man·aha indiba laptop-kode man·kujaenga ine East Khasi Hills a·jani SP Vivek Syiem parakataha.
Syiem-ni aganani gitade, ia laptop-ko Silome James an·tangan ramasamchi galangaha ine ku·rachakaha indiba da·o dipet ia laptop-ko man·pilkujaenga.
Adita salrangna skangsan Meghalaya Police-ni SIT, Indore songjinmani MR3 Hare Krishna Vihar minggipa biapo wa·al so·gimin bag ge·sako man·ahachim aro ia bag-on gong lak 5 tangkarang, pistol, Sonam-ni phone aro Raja-ni ma·manti gam-jinrangba dongachimkon ine police-rang chanchichipani ong·kataha.
Indore songjinmao da·o dipet Meghalaya Police-ni SIT, mande sakgittam, chong·motan Silome James, Balbir Ahirbar aro Lokendro Singh Tomar-ko rim·aha aro ia manderangko sing·sandina gita SIT, bakan Meghalaya a·dokona rimbana sienga ine SP u·iataha.